Qazaqstan Respýblıkasy Parlamenti Senatynyń Tóraǵasy Qasym-Jomart Toqaev jumys babyndaǵy saparmen Nıý-Iorkke keldi, ol munda BUU Bas hatshysy Pan Gı Mýnmen jáne Birikken Ulttar Uıymynyń birqatar joǵary laýazymdy adamdarymen kezdesedi, dep habarlady Parlament Senatynyń baspasóz qyzmeti.
Senat Tóraǵasy, Álemdik jáne dástúrli dinder kóshbasshylary sezi Hatshylyǵynyń basshysy Q.Toqaev BUU-da osy forýmnyń tanystyrylymynda sóz sóıleıdi. Besinshi dinı sammıt bıylǵy 10-11 maýsymda Astanada ótedi jáne ol dinı kóshbasshylar men saıası qaıratkerlerdiń beıbitshilik, damý jáne qaýipsizdik jolyndaǵy únqatysýyna arnalady.
Q.Toqaev saparynyń baǵdarlamasynda iri qorlardyń basshylary – Azııa qoǵamynyń prezıdenti Dj.Shıranmen, «Eýrazııa» tobynyń prezıdenti Iа.Bremmermen, О́rkenıetter alıansynyń Joǵary ókili N.An-Nasermen, «Beıbitshilik jolyndaǵy din» konferensııasynyń Bas hatshysy Ý.Vendlımen jáne Nıý-Iork dinı qaýymdastyǵynyń ókilderimen kezdesýler bar.