Qysylǵanǵa qol ushyn sozýǵa daıyn turatyn halqymyzdyń qasıeti bul kúnde baýyrlas Qyrǵyzstandaǵy jaǵdaıǵa baılanysty taǵy bir tanylyp otyr. Kórshi eldi qıyndyqtan shyǵarýǵa, qoltyqtan demeýge barynsha kómek-qoldaý jasalyp jatqany málim. Sonyń jarqyn aıǵaǵy Qaraǵandydan Osh jáne Jalalabad qalalary turǵyndaryna arnalyp 2 vagonǵa lyq toltyra qaraqumyq tıelýi boldy.
Keshe tilshiler qosynyna atalǵan taǵam túri 188 tonnasynyń 128 tonnasy oshtyqtar, 60 tonnasy jalalabadtyqtar qolyna aparylyp tapsyrylatyndyǵy habarlandy. Olar Abaı aýdanynyń Iýjnyı kentindegi memlekettik rezervtik qoımadan qos vagonǵa artylyp jiberildi. Búgin ne erteń keden beketinen ótip, qabyldap alýshylar qolyna tımek.
“Rezerv” RMK fılıalynyń dırektory Álmusa Jaqanov aıtqandaı, qaraqumyqty arnaýly jasaq tıisti jerlerge jetkizip salady. Qyrǵyz aǵaıyndardy azyq-túlikpen qamtamasyz etý munymen shektelip qalmaıdy. Aldaǵy ýaqytta basqa da kómek túrlerin jóneltý jalǵastyrylady.
“Kórshi aqysy – táńir haqysy”, degendeı, halqymyz óziniń kórshilik paryzyna berik.
Aıqyn NESIPBAI, Qaraǵandy.