ALMATY. 3 sáýir. Almaty polısııasy jyljymaly KRIS-P fotoradar keshenin iske qosady. Bul týraly qalalyq ishki ister departamentiniń baspasóz qyzmetine silteme jasaǵan Tengrinews.kz tilshisi habarlady.
Quqyq qorǵaý organdarynyń málimetinshe, atalmysh qurylǵy birinshi kezekte tez jyljymaly bolýymen erekshelenedi. Almaty polısııasy osyny eskere kelip, KRIS-P jyljymaly fotoradar keshenin paıdalanýǵa sheshim etti. Polısııadaǵylardyń aıtýynsha, ol endigi jerde apat deńgeıi joǵary jol ýchaskelerin avtomatty tártipte baqylap, joldaǵy jalpy ahýaldy jaqsartýǵa septigin tıgizedi. Áýelgi kezde osyndaı 10 keshen iske qosylatyn bolady. Olar ornalasqan jerlerin qala joldaryndaǵy jaǵdaıdyń ózgerýine baılanysty aýystyryp turady.
«Qazir turaqty túrde apat deńgeıi joǵary jol ýchaskelerin anyqtaıtyn arnaıy saraptama jasalyp jatyr. Tájirıbege súıensek, kóp jaǵdaıda jol qozǵalys erejesin buzý derekteri foto-vıdeofıksatorlardyń kómegimen anyqtalyp júr. Bul qurylǵy joldaǵy apattar men odan zardap shekkender sanyn azaıtýǵa kómektesedi», - deıdi Almaty qalalyq ishki ister departamenti bastyǵynyń orynbasary Jandos Muratalıev.
Eske sala keteıik, aqpan aıynda Qazaqstannyń táýelsiz avtomobılshiler odaǵy KRIS-P jyljymaly fotoradar kesheni paıda bolǵanyn jetkizgen edi. Keıin ishki ister departamentiniń ókilderi onyń ázirge tek synaqtan ótip jatqanyn habarlady.
Talǵat Súıinbaı.
Derek: Tengrinews.kz.
Foto: Drive2.ru.