AQTО́BE. 20 qazan. Aqtóbede úshinshi ret TMD-daǵy biregeı, erekshe korporatıvtik mereke – tálimgerler kúni atap ótildi. Bul týraly egemen.kz tilshisi habarlady.
Osy jyly shara Eýrazııalyq topqa (ERG) múshe «Qazhrom» kompanııasynyń 20 jyldyq mereıtoıyna arnaldy. Kompanııanyń fılıaldary – Dóń taý-ken baıytý kombınaty, «Qazmarganes» ken basqarmasy, Aqsý jáne Aqtóbe ferroqorytpa zaýyttarynyń óndiris jáne áleýmettik salasynyń úzdik tálimgerlerine qurmet kórsetý Tahaýı Ahtanov atyndaǵy oblystyq drama teatrynda uıymdastyryldy. Merekege tálimgerlerdi ǵana emes, sonymen birge olardyń úırenýshileri men áriptesteri de shaqyryldy.
Úzdik tálimgerlerdi irikteý kezindegi basty sharttar – úırenýshiler sany men olardyń qyzmet boıynsha kóterilýi, qamqorlyqqa alynǵandar men bólimshe basshylarynyń lebizderi nazarǵa alyndy. Budan basqa, korporatıvtik tálimgerler joǵary kásibı sheberligi men jumysta turaqty kórsetkishke jetken laıyqty qyzmetkerlerden tańdap alyndy. Aıta ketý kerek, eń úzdik tálimgerdiń biri bolyp Baýyrjan О́temisov tanyldy. Kásiporynda eńbek etken 28 jyl ishinde ol usaqtaýshydan bastap Dóń TKBK-nyń dırektory orynbasarlyǵyna deıin kóterilgen.
«Qazhromnyń» altyn qory bolyp tabylatyn úzdik tálimgerler men qyzmetkerlerge gúlder, syılyqtar, kompanııa basshylyǵy atynan aqshalaı syıaqylar tapsyryldy.
Satybaldy Sáýirbaı.
Derek, sýret: egemen.kz.