Uıaly baılanys tarıfi tómendeıdi

Sársenbi kúni Baılanys jáne aqparat mınıstrliginde mınıstr Asqar Jumaǵalıevtiń tóraǵalyq etýimen baılanys operatorlary keńesiniń kezekti jıyny ótti. Otyrysta uıaly baılanys operatorlary qyzmetteriniń tarıfterin tómendetý týraly málim etilip, Baılanys jáne aqparat mınıstrliginiń tarıfterdi tómendetý týraly usynysy barlyq uıaly baılanys rynogyna qatysýshylardyń qoldaýyn tapty. Otyrys barysynda belgili bol­ǵandaı “GSM Qazaqstan “Qazaq­te­lekom” AAQ kompanııasy eń qymbat mınóttiń qunyn qyrkúıektiń 29-ynan bastap 19 teńgege deıin túsirýdi jos­parlaýda. Mınóttiń ortasha quny 9 teńgeni quraıdy. “Kartel” JShS berilgen usynysty qoldap, tarıf­te­riniń tıisinshe tómendeıtinin má­lim­dedi. “Mobaıl Telekom Servıs” JShS-nyń ishki jelidegi tarıfteri de mınótine 19 teńgeden aspaıtyn bolady. Baılanys jáne aqparat mınıs­tri Asqar Jumaǵalıev operator­lar­dyń qyzmetterge degen tarıfterdi tómen­detýi tutynýshylar tarapynan sózsiz baǵalanady dep atap ótti. So­nymen birge, ol mınıstrliktiń budan ári de osy baǵytta tıisti jumystar atqa­ra­tyndyǵyn da nazardan tys qaldyr­mady. Operatorlar da únemi osy má­selege mán berip otyrýy tıis jáne ýa­qyt aǵymy men tutyný­shy­lardyń qa­jettiligin eskere otyryp, óziniń ta­rıftik saıasatyn retteýi tıis, – dedi ol. Interkonnekt tarıfterin tómen­detý máselesi de zeıinsiz qalmady. “GSM Qazaqstan “Qazaqtelekom” AAQ kompanııasynyń bas atqarýshy dırektory Veısel Aral, kompanııa jalpy jeliaralyq birigýlerge degen stavkany 20% tómendetýge daıyn dedi. “Kartel” JShS-nyń bas dı­rek­tory Anatolıı Popov bolsa, usy­nysty qoldaı otyra, kenetten birden tómendetýden kom­pa­nııa eko­nomıkasyna nuqsan kele­tinin aıtty. Al, “Mobaıl Telekom Servıs” JShS-nyń Bas dırektory Andreı Smelkov ınterkonnekt stavka­la­rynyń áldeqaıda tómen­deıtini týraly oıyn bildirdi. Biz mınıstr­liktiń usynysyn qoldaımyz jáne ınterkonnekt tarıfterin daý­ystyq trafıkti ótkizýi úshin mı­nó­tine 19,98 teńgeden 5,04 teńgege deıin tómen­detýdi usynamyz, – dedi ol. Interkonnektke degen salym memleketpen rettelmeıtindikten, mınıstr kezdesýge qatysýshylardan jeliaralyq baılanysýlar tarıfin 20 paıyzǵa tómendetýdi qarastyrýdy jáne bir kelisimge kelýdi, sondaı-aq, odan ári tómendetý jaqtaryn qaras­tyrýdy usyndy. Baılanys jáne aqparat mınıs­trligi osy jyldyń naýryz-sáýir aı­larynda uıaly baılanystyń qunyna baılanysty jaǵdaıdy taldap ótti. О́tkizilgen taldaý, basqa eldermen salystyrǵanda, tarıfterdiń joǵarǵy deńgeıin kórsetken. Ábdirahman QYDYRBEK.