Sarybel – Saryarqanyń saýyry. Kezinde osylaı atalǵan, bertinde Osakarov bolyp ózgertilgen aýdannyń keńestik dáýirde ákimshilik-aýmaqtyq jaǵynan jeke aımaqqa bólinip, qurylýyna 70 jyl tolýy merekesi atalyp ótti.
Osy aıtýly oqıǵaǵa arnalǵan teatrlandyrylǵan qoıylymda óńirdiń bul ýaqyttaǵy shejirelik kórinisteri kópshilik kóz aldyna elestetildi. Osakarov – Astana men Qaraǵandynyń dál ortasynda ornalasqan, toǵyz joldyń torabyndaǵy aýdan. Negizinen astyq ósirýmen aınalysatyn óńir osy salany damytýymen ataqty. Saryarqanyń saýyry – Sarybel baýyryna jınalýshylar belgili ónerpazdar ónerin, balýandar kúresin, at jarysyn tamashalady.
Aıqyn NESIPBAI, Qaraǵandy oblysy.
Qala merekesi saltanaty. О́tken juma kúni “Aıalaımyn seni, Qyzylorda” atty qala merekesi saltanatty jaǵdaıda ótti. Qala kúni merekesine arnalǵan is-sharalar aıasynda Qyzylorda qalasyndaǵy “Shuǵyla”, “Evrıka” shaǵyn aýdandary men Jalańtós bahadúr kóshesi boıyndaǵy oıyn jáne sport alańdary paıdalaýǵa berildi. Balalarǵa sport alańdaryn “Petro Qazaqstan”, “Torǵaı Petroleým”, “QazGerMunaı” kompanııalary tartý etti. Qala merekesi tús aýa ortalyq alańda jalǵasty. Merekelik sharalar barysynda ulttyq oıyndardan saıystar boldy. Saltanatty shara sońynda elimizdiń óner sheberleri men sheteldik ónerpazdar – “London bıt”, “SMIKS”, “Marsel” toptary óner kórsetip, qalyń qaýymnyń rızashylyǵyna bólendi.
Erkin ÁBIL, Qyzylorda.
Sibirdiń kórmesi – Kerekýde. Keden odaǵyna engeli Qazaqstan men Reseı arasyndaǵy alys-beris baılanystar odan ári jaqsara, jandana túskeni belgili. Bul saýda-ekonomıkalyq, áleýmettik-mádenı, basqa da salalar boıynsha kórinis tabýda.О́tken aptada oblys ortalyǵynda “Qazaqstan-Sibir-2010” dep atalatyn kórme ótip, bul sharaǵa eki eldiń 30-ǵa jýyq kásiporny qatysty. Oblystyń jalpy taýar aınalymynyń 70 paıyzy Reseıdiń úlesinde. Oblys ákimi Baqytjan Saǵyntaev kórmeni aralap, óndiristi óńirge óz ónimderin ákelgen kásipkerlerge tabys tiledi. Kórmeden soń kásipkerler Keden odaǵy, jańa tehnologııalar, ekologııalyq taza ónimder shyǵarý jóninde uıymdastyrylǵan dóńgelek ústel basyna jınaldy.
Farıda BYQAI, Pavlodar.
“Juldyz” ámbebap bazary ashyldy. Almaty qalasynyń aınalasynan azyq-túlik beldeýin qurý maqsatynda júrgizilgen jumys nátıjesinde tutynýshy suranysy qanaǵattandyrylýda. Sharýalardyń óndirilgen ónimderin saýdalaıtyn bazarlardy kóptep ashý, jármeńkeler uıymdastyrýdyń tııanaǵy keltirilgeni osynyń dáleli desek, Talǵar aýdanyndaǵy onnan astam bazarlar qataryna jańadan ashylǵan “Juldyz” bazary qosyldy. Negizinen azyq-túliktiń halal túrin saýdalaıtyn saýda ornynda eki myńnan astam adamnyń saýda jasaýyna múmkindigi bar. Qazirgi kezde bazarda tutynýshylardy turaqty, ári tómen baǵadaǵy ónim túrlerimen qamtamasyz etý qolǵa alynǵan. Sórelerde et-sút, kókónis, kıim-keshek, azyq-túlik, qurylys zattary men avtokólikterdiń qosalqy bólshekterine deıin bar.
Kúmisjan BAIJAN, Almaty oblysy.
Festıval aıasyndaǵy aıtys. Qazaqstan halqy tilderiniń HII oblystyq festıvali aıasynda uıymdastyrylǵan aımaqtyq aqyndar aıtysy qazaǵy qalyń Shal aqyn aýdanynda ótti. Oǵan Kókshe óńiriniń saıypqyrandary da qatysty. Sahnaǵa birinshi bolyp qyzyljarlyq Amanjol Zaǵypar men shalaqyndyq Álibek Serǵalıev kóterildi. Munda aımaqtyq sóz saıysynda kóbirek kórinip júrgen Álibek jeńip ketti. Kókshetaýlyq Qýanysh Ospanov pen taıynshalyq Azamat Qojanovtyń óneri teń baǵalanyp, kelesi aınalymǵa joldama aldy. Esil aýdanynyń namysyn qorǵaǵan Jumabek Rahymov ta aqtyq synǵa alqynbaı jetti. Kıeli sahnaǵa alǵash shyqqanyna qaramastan, qarsylastaryna des bermegen Azamat bas báıgeni jeńip aldy. Aıtysty uıymdastyrýǵa jeke kásipker Dásten Baımuqanov úlken úles qosyp, qarjylaı qoldaý kórsetti.
О́mir ESQALI, Soltústik Qazaqstan oblysy.
Tyń epopeıasynan syr shertedi. Oblystyq arhıvter jáne qujattama basqarmasy “Qostanaı oblysyndaǵy tyń jáne tyńaıǵan jerlerdi ıgerý” atty qujattama jınaǵyn shyǵardy. Bul qujattama basylymy óńir tarıhyn zertteýshiler men ony bilgisi keletin jalpy jurtshylyqqa arnalǵan. Jınaqqa kirgen Qostanaı oblysynda tyń jáne tyńaıǵan jerlerdi ıgerý jaıyndaǵy qujattardyń basym kópshiligi birinshi ret ǵylymı aınalymǵa engen. Prezıdent arhıviniń qorlarynan, Qazaqstan memlekettik arhıvinen, oblystyq arhıvten jáne onyń fılıaldarynan alynǵan qujattar qazaq dalasyndaǵy tyń epopeıasyn jan-jaqty kórsetedi. Kitap 350 danamen jaryqqa shyqty.
Názıra JÁRIMBETOVA, Qostanaı.
Aqyndar stýdenttermen kezdesti. Mundaı shyraıly júzdesý Aqtóbe pedagogıkalyq ınstıtýtynda ótti. Stýdent jastarmen kezdesýge aqtóbelik aqyndar Meıirhan Aqdáýletuly, Ertaı Ashyqbaev, Baýyrjan Babajanuly keldi. Kezdesýdi qysqasha sóz sóılep ashqan osy joǵary oqý ornynyń rektory, ekonomıka ǵylymdarynyń doktory Ǵalymjan Nuryshev ana tiliniń adam ómirindegi orny, memlekettik tildi qoldaný aıasyn keńeıtý týraly oı qozǵady. Aqyn Meıirhan Aqdáýletuly qazaq tiliniń búgingi jáı-kúıine, onyń bolashaǵyn baıandy etýdiń keıbir túıtkilderine toqtaldy. Aqyndar ózderiniń óleńderin oqydy. Stýdentter de aqyndardyń jyrlarynan syı tartty. Bir top jas talap ózderiniń balǵyn týyndylaryn nazarǵa usyndy.Júzdesýge kelgen aqyndar jastardyń birqatar suraqtaryna jaýap berip, ózara oı bólisti.
Satybaldy SÁÝIRBAI, Aqtóbe.