“Egemen Qazaqstannyń” VII Qysqy Azııa oıyndaryna arnalǵan sársenbilik beti

Azıadaǵa 122 kún qaldy

Azıada jarshysy

Telearnadaǵy tikeleı kórsetilim

Azıadada ol qalaı uıymdastyrylyp, júzege asady?

Qysqy Azııa oıyndary kezinde jarysty tamashalaý úshin elimizdiń jer-jerinen jáne shetelderden Astana men Almatyǵa qonaqtardyń kóptep keletini belgili. Qazir olarǵa jarysty óz kózimen kórip, teleekrannan tikeleı kórsetilim arqyly kórý úshin barlyq jaǵdaılar jasalyp otyr. Jaqynda biz osy máseleni anyqtap, tolyq málimet alý úshin “2011 jylǵy qysqy Azııa oıyndaryn uıymdastyrý jónindegi komıtetiniń atqarýshy dıreksııasy” AQ vıse-prezıdenti Maǵjan QANǴOJINDI áńgimege tartqan edik. – Azııa oıyndaryn tikeleı kórsetý quqy “Habar” men “Qazaqstan” telearnalaryna beri­lip otyr ǵoı. Bul másele qalaı sheshildi? Basqa arnalar jarysty kórsetpeıdi me eken? – Biz shańǵymen baǵdarlaý jarysynan basqalarynyń bárin tikeleı kórsetilim ar­qyly kórsetýdi josparlap otyrmyz. Al shań­ǵymen baǵdarlaý offline rejiminde, ıaǵnı jaz­bada ǵana kórsetiledi. Baılanys jáne aqparat mınıstrligi “Habar” arnasyn ulttyq taratý­shy retinde belgiledi. Ol “Qazaqstan” tele­arnasymen birge tikeleı kórsetilimmen aınalysady. – Jarysty basqa elderge kórsetý jos­parda bar ma? Sheteldik kompanııalar tarapy­nan oıyndardy kórsetýge qyzyǵýshylyq bolyp otyr ma? – Iá, basqa elderdi oıyndardy tikeleı kórsetilimmen qamtamasyz etý josparda bar. Al shetel telekompanııalaryna keler bolsaq, qazir olarmen osy másele boıynsha kelissózder júrgizilýde. – Tikeleı kórsetilimdi uıymdastyrý úshin televıdenıege arnalǵan qural-jabdyqtardy aldyńyzdar ma? Olar qazirgi zaman talap­taryna jaýap bere me? – Azııa oıyndaryn uıymdastyrý jónin­degi komıtettiń atqarýshy dıreksııasy tele­kór­setilim úshin eshqandaı qural-jabdyqtar satyp alýmen aınalyspaıdy. Biz halyqaralyq tájirıbege súıene otyryp, hosttaratýshy kási­bı kompanııamen kelisim jasastyq. Host­taratýshy degenimiz – televızııalyq nemese radıo belgiler arqyly oqıǵa bolyp jatqan jerinen kórsetýdi uıymdastyrady. Host­taratýshy túsirilimderdi usynatyn bolady. Al Azıadany uıymdastyrýshylar ony kórsetý quqyn ıelenýshi jaqqa beredi. Qazir biz televıdenıe belgisiniń sapasyna basa mán berip otyrmyz. Sondyqtan hosttaratýshy onyń sapasyn qamtamasyz etýi kerek. – Tikeleı kórsetilimniń tehnıkalyq jaqtary týraly aıtyp berseńiz. Olardyń qandaı erekshelikteri bolady? – Qysqy Azııa oıyndary kezindegi kórsetilim Vankýverde ótken Olımpııa oıyn­darynan berilgen kórsetilim sııaqty bolady. Bizdiń shaqyryp otyrǵan hosttaratýshy – tájirıbeli kompanııa. Jalpy, televıdenıe áleminde osyndaı iri sharalarmen jekelegen mamandar ǵana aınalysady. – Jarys kezinde qaıtalaýdy ár jerden kórsetý de mańyzdy nárse ǵoı. Ekrandyq grafıkany aıtamyn. Máselen, shańǵy nemese bıatlon jarysyndaǵy hronometrajdy kórsetý jaǵyn aıtsańyz, kórermender qaı sportshynyń alda kele jatqanyn, odan artyndaǵylar neshe sekóndke qalyp bara jatqanyn qalaı bile alady? Hokkeı matchtaryn alsaq ta bolady. Match kezinde qaýipti jaǵdaıdy qaıtalaý, shaıbaǵa talas bolǵan kezderdi, statıstıkany ekrannan kórsetý jaǵy qalaı bolady? – Munyń bári de bolady. Jarystyń nátıjelerimen jumys isteý úshin fıksasııa jáne nátıjelerdi jınaıtyn arnaıy júıe dıyndalady. Oǵan qazir ońtústikkoreıalyq SICC (Ssangyong Informations Communications Corporation) jáne shveısarııalyq SWISS TIMING kompanııasy tartylyp otyr. Olar hosttaratýshylarmen birge málimetterdi tikeleı efırge jáne kommentatorlardyń monıtoryna berip otyrady. Al jarystaǵy qyzyqty oqıǵalardy, oıyn barysyn qaıtalaý úshin joǵary jyldamdyqty Super slow motion kameralary bolady. Sonymen birge hokkeı matchtarynda qosymsha televızııalyq grafıkany iske qosamyz. – Bizdiń elde osyndaı qural-jabdyqtarmen jumys isteıtin mamandar bar ma? – Árıne, bar. Bizde qazirgi zaman talabyna saı jasalǵan televızııalyq jabdyqtar óte kóp. Onymen jumys isteı alatyn adamdar da bar. Biraq, Azııa oıyndary sııaqty iri sharalarda jumys istegen, tájirıbesi bar adamdar az. Sondyqtan biz hosttaratýshyny shaqyryp otyrmyz. Bul, árıne otandyq telekompanııalar jarysty kórsetpeıdi degen sóz emes. Olar jergilikti halyqqa qyzyqty jarystardy tańdap alady. Al basqa elderge tartymdy, qyzyqty básekelerdi hosttaratýshy kórsetedi. – Otandyq operatorlar, rejısserler men kommentatorlardy qaıta daıyndaý qalaı júrgizilip jatyr? Bul máselemen kim aınalysyp otyr? – Azııa oıyndaryn kórsetý jobasynda eń bastysy tehnıka emes, shyǵarmashylyq adamdar. Olar – operatorlar, rejısserler, bárin ortaq iske jumyldyra biletin jobanyń menedjerleri. Bul jarys biz úshin úlken mektep bolady. Budan kóp nárse úırenemiz. Al, mamandardy qaıta daıyndaý máselesine kelsem, biz onymen aınalyspaımyz. Bul jumyspen telekompanııalardyń ózderi belgili bir baǵdarlamalar men jobalar aıasynda aınalysa alady. Demeýshiler tabylyp jatsa, dıreksııa sport kommentatorlaryna arnalǵan semınarlar ótkizýge daıyn. – Azııa oıyndaryn tikeleı kórsetýdiń taǵy qandaı ereksheligi bolady? ­­­­­– О́zderińizge belgili, Astana men Almaty­nyń arasy myń shaqyrymnan astam. Sondyq­tan eki qalada halyqaralyq tara­tý ortalyǵy (IVS) qurylady. Oǵan barlyq jarystar ótip jatqan jerlerden televızııalyq belgiler ke­lip turady. Osy jerde biz Astana men Alma­tynyń ny­san­daryn tikeleı kórsetilim­men qamtamasyz etý úshin ózimizdiń qolda bar múm­kindikterimizdi paıdalanamyz. Ol úshin bizge “Qazaqtelekom” AQ ulttyq tele­kommý­nıkasııalyq operatory kómektesetin bolady. – Áńgimeńizge rahmet. Áńgimelesken Dastan KENJALIN. Almatydaǵy shańǵyshylar kesheni Qysqy Azııa oıyndaryna daıyn Senbi kúni Almaty qalasynda shańǵy sporty boıynsha jańadan iske qosylǵan halyqaralyq tuǵyrdan sekirý kesheninde qurlyqaralyq kýbok úshin jarys ótti. Atalmysh keshen “Esentaı” ózeniniń batysynda Ál-Farabı dańǵylynyń soltústik bóliginde ornalasqan. Ol 6000 kórermenge ar­nalǵan orny bar kóp salaly zamanaýı ǵımarat. Azııa oıyndary ótkennen keıin bul keshendi konsertter men túrli shoý-baǵ­darlamalar ótkiziletin mádenı oıyn-saýyq ortalyǵy retinde paıdalaný josparlanýda. Joǵaryda aıtqanymyzdaı, osy stadıon­nyń tusaýkeseri retinde munda alǵashqy báse­ke, jarystar da bastaý aldy. Oǵan 12 elden, atap aıtqanda, Qazaqstan, Polsha, Japonııa, Germanııa, Slovakııa, Estonııa, Nıderlandy, Reseı, Avstrııa, Ońtústik Koreıa, Slovenııadan sport­shy­lar qatysty. Olardyń arasyndaǵy tanymal sportshylar­dan álem kýbogynyń jeńimpazdary slo­vendik shańǵymen tuǵyrdan sekirýshi Prmoj Peterka, cheh Iаkýb Iаnda, Gran-prı 2010 kezeńderiniń jeńimpazy, polshalyq Kamıl Stoh, álem kýbogyna qaty­sýshy avstrııalyq sportshy Marıo Innaýer, Týrın jáne Vankýverde ótken Olımpıa­dalarǵa qatysýshy reseılik Ilıa Roslıkov pen basqa da sań­laq­tar baq synasty. Jarysta Kamıl Stoh jeńimpaz atandy. Olar osynda ornalasady Radisson SAS Hotel Astana Saryarqa kóshesi, 4 Bes juldyzdy, 139 nómirli qonaq úı. AOK otbasy, AOK jetekshileriniń shtaty, HOK músheleri ornalasady. Ramada Plaza Astana Abaı dańǵyly, 47 Bes juldyzdy, 200 nómirli qonaq úı. UOK prezıdentteri, bas hatshylaryna arnalǵan. King Hotel Ýálıhanov kóshesi, 7 Tórt juldyzdy, 475 nómirli qonaq úı. Delegasııa basshylary men orynbasarlary, hokkeıden erler, konkı tebý, mánerlep syrǵanaý men short-trek komandalary ornalasady. Grand Park Esil Beıbitshilik kóshesi, 8 Tórt juldyzdy, 86 nómirli qonaq úı. Quqyq ıelenýshilerge arnalǵan. Kádesyılar kórmesi Almatyda “Ádemi-Aı Plus” kompanııasyna qarasty “Áde­mi-Aı” óner úıinde qysqy Azııa oıyndaryna arnalǵan kádesyılar toptamasynyń tusaýkeseri ótti. Rásimde “2011 jylǵy VII qysqy Azııa oıyndaryn uıymdastyrý jónindegi komıtetiniń atqarýshy dıreksııasy” AQ vıse-prezıdenti Aıbek Qapaqov oıyn barysynda elimizge on myńnan astam qonaqtyń keletinin, olar bizdiń elden qyzyqty jarystarmen qatar Azıada kádesyı­laryn alatynyn, sondyqtan oıyn­dar belgisindegi sývenırler ulttyq naqyshtarymyzdan belgi beretinin atap ótti. “Ádemi-Aı Plus” kompanııasy qysqy Azııa oıyndarynyń resmı kádesyılar jasaýshysy jáne tara­týshysy bolyp tanylyp otyr. Qa­zaqstan rynogynda on jyldan astam ýaqyt nátıjeli jumys istep kele jatqan kompanııanyń elimizde bar­lyq derlik óńirlerinde óz ókildikteri bar. Kompanııa ulttyq ónerimizdi, tarıhymyzdy jáne salt-dástúrimizdi nasıhattaıtyn buıymdar arqyly keńinen tanymal. Olar daıyndaǵan zergerlik buıymdar ótken tarıhy­myzdan syr shertetin áıgili eskert­kish-monýmentterdiń, táýelsizdik sımvolyna aınalǵan Astananyń syr-sıpatyna arnalǵan belgiler jurt kóńilinen shyqqan. Kompanııa “Arý Astana” III halyqaralyq kór­mesinde úzdik atanyp, sapa men sán turǵysynda aldyńǵy qatardan kórindi. Jańadan ashylatyn óner úıinde asa qymbat zattardan bastap, turmysqa qajetti dúnıeler de oryn alǵan. Olar árbir úıdiń tórinde turatyn sándi de mándi tablodaǵy keri esepteý beınesi, sporttyq nysandar maketi, oıynǵa arnalǵan estelik medaldar, tumar – barys jáne altynnan, móldir taza shynydan jasalǵan zattar. “Tarıhı mańyzy bar qysqy Azııa oıyndaryna arnalǵan sharalarǵa qatysý biz úshin úlken mártebe. Biz­diń ónimder kádesyılar pavılon­darynda taratylady. Olardy biz shet el qonaqtary men qazaqstandyqtar úshin qýana syıǵa tartamyz”, – deıdi “Ádemi-Aı Plus” kompanııasynyń prezıdenti Bahargúl Tólegenqyzy. Bılet jaıynan bir habar Qysqy Azııa oıyndaryna bıletterdiń qarasha aıynyń ortasy nemese jeltoqsannyń basynda satyla bastaıtyny belgili boldy. “2011 jylǵy VII qysqy Azııa oıyndaryn uıymdastyrý jónindegi komıtettiń atqarýshy dıreksııasy” AQ-tyń vıse-prezıdenti Evgenıı Nıkıtın­skıı bıletterdiń erterek sa­tyla bastalýy sebebin oǵan degen suranyspen baılanys­ty­rýda. Onyń aıtýynsha, Azıa­danyń ashylý jáne jabylý saltanaty, konkı tebý, erler arasyndaǵy hokkeı men mánerlep syrǵanaý jarysta­ryn tamashalaý úshin bıletter tez satylýy múmkin. Taǵy bir belgili bolǵany, bıletter kassalarda satylady, sonymen birge ony ǵalamtorda tapsyrys berip alýǵa bolady. Ázirshe bıletterdiń baǵasy bel­gilengen joq. Biraq jer­gilikti halyq pen shetel qonaq­taryna baǵa birdeı bolady eken. Sonymen birge jarys­tarda VIP bıletteri satylady. Alystan jetken alǵys hat Jaqynda elimizge Ulbrıtanııa Koroldiginen qysqy Azııa oıyndarynyń daıyndyq barysymen tanysý úshin osy eldiń týrızm salasyna mamandanǵan bir top BAQ ókilderi kelip qaıtqany belgili. Solardyń ishinde bolǵan Euro Asia Communications kompanııasynyń basqarýshy dırektory Tonı Entonı Fılıps saparynan alǵan áseri týraly sol kezde shetel jýrnalısterin Astananyń Azıadaǵa daıyndyq barysymen tanystyrǵan “2011 jylǵy VII qysqy Azııa oıyndaryn uıymdastyrý jónindegi komıtetiniń atqarýshy dıreksııasy” AQ vıse-prezıdenti Serik Qulmyrzaevqa joldaǵan alǵys hatynda bólisýdi jón kóripti. Tómende oqyrman nazaryna sol hattyń mátinin usynyp otyrmyz. – Sizben jáne qysqy Azııa oıyndaryn uıymdastyrý jónin­de­gi komıtettiń atqarýshy dırek­sııa­syndaǵy áriptesterińizben kez­des­kenime qýanyshtymyn jáne Ulybrıtanııa Koroldiginen kel­gen BAQ ókilderin qazaqy qonaq­jaılylyqpen qarsy alǵandaryńyz úshin alǵysymdy bildiremin. Osy topta bolǵan áriptesterimizdiń bári qysqy sport túrlerine arnalǵan ha­lyqaralyq deńgeıdegi sporttyq ǵımarattardyń salyný barysyna tańdanystaryn jasyrmaı keldi. Kelesi jyly Astana men Alma­tyda ótetin qysqy Azııa oıyndary Eýrazııa kindiginde ornalasqan, saıası turaqty, ekonomıkalyq ja­ǵynan damyp kele jatqan siz­der­diń elderińiz úshin óte mańyzdy oqıǵa bolatyny sózsiz. Osy oraıda sizge Qazaqstandy álemge jan-jaqty tanytý úshin búkil dúnıejúzine habar taratatyn BAQ-tyń Azııa oıyndary kezinde atqaratyn róli jóninde bir-eki aýyz sóz aıtqym keledi. Qazirgi kezde halyqaralyq talaptarǵa saı jasalǵan baılanys júıesiniń bizdiń ómirimizde alatyn orny erekshe. Osyǵan oraı, eger siz­dermen qysqy Azııa oıyndaryn, jalpy Qazaqstandy BAQ-ta joǵa­ry halyqaralyq talaptarǵa saı kórsetetin kompanııa qajet bolsa Euro Asia Communications (eacom­ms) “2011 jylǵy VII qysqy Azııa oıyndaryn uıymdastyrý jónin­de­gi komıtettiń atqarýshy dıreksııa­sy” AQ-pen birigip jumys isteý múmkindigin qarastyratyn bolady. Bizdiń kompanııa sizderge oqı­ǵalardy basqaryp, redaktorlyq qoldaý kórsetýge ázir. Eacomms soń­ǵy 20 jylda Azııa men Eýro­pada belsendi ári tabysty jumys istep keledi. Osy ýaqyttyń ishinde ózim 50-den astam halyqaralyq tutynýshy­lar­men jumys istedim jáne sońǵy 4 jyldan beri Air Asta­na kompanııa­sy­nyń solardyń qa­tarynda bolyp otyrǵanyna qýanyshtymyn. Búginde álemdegi eń iri aeroǵaryshtyq kórmelerdiń biri gongkongtik Asian Aerospace Azıa­daǵa qyzyǵýshylyǵyn bildirip otyr. Bul kórmege bizdiń kompa­nııa jıi qatysady. Onda Eacomms kórmege 500-den astam iri qaty­sýshy men 12 000-nan astam kelý­shi­ge ha­lyq­aralyq baılanys pen oqıǵalarǵa redaktorlyq qoldaý kór­setýge óz usynystaryn berip keledi. Sóz sońynda aıtaıyn degenim, eger sizderge qysqy Azııa oıyn­da­rynda Eacomms tarapynan qol­daý qa­jet bolsa kompanııa kelesi aıdan bas­tap strategııalyq keńes berip, ha­lyqaralyq medıa qarym-qatynas pen redaktorlyq qoldaý boıynsha al­dyn ala usynystaryn berýge daıyn. Qurmetpen, Tonı Entonı FILIPS, Euro Asia Communications kompanııasynyń basqarýshy dırektory. _____________________ Betti daıyndaǵan Dastan KENJALIN.