Elbasy Nursultan Nazarbaevtyń «Ult Jospary –qazaqstandyq armanǵa bastaıtyn jol» maqalasyn oqyp, tereńirek tanystym. Zaman júgin arqalaǵan bul mańyzdy qujatta aıtylǵan máseleler árbir qazaqstandyq úshin búgingi kúni meılinshe ózekti. Biz, aýyl sharýashylyǵy salasynyń mamandary, Memleket basshysynyń atalǵan maqalasynan ózimizge qajetti mindetter men maqsattardy aıqyn ańǵara alamyz. Agrarlyq sala úshin eń mańyzdy másele jermen jumys ekeni belgili. «Bes ınstıtýttyq reforma «100 naqty qadam» – Ult Jospary arqyly osy baǵyttaǵy kóp máselelerdi sheshýge jol ashyldy deýge tolyq negiz bar. Ol Elbasynyń atalǵan maqalasynda: «Fermerlik pen búkil agrarlyq sektordy damytý úshin aıtarlyqtaı yntalandyrýshy kúsh Jer kodeksine engizilgen ózgerister boldy» dep atap kórsetilgen. Osy arqyly jermen jumys isteıtin agroónerkásiptik keshen nysandary, fermerler qaýymy jerdi paıdalanýda kóptegen jeńildikterge qol jetkize aldy. О́ndiriste jumys oryndaryn saqtaýǵa baılanysty batyl qadamdarǵa jol ashylǵan.
Maqalada aıtylǵan kóp máselelerdiń eginshilikpen shuǵyldanatyn aýdandarǵa tikeleı qatysy bar. Bul jóninde biz Elbasy tapsyrmalaryn oryndaýǵa ázirmiz. Naqty baǵyttar boıynsha sheshýshi jumystar qolǵa alynyp otyr dep batyl aıta alamyz. О́tken jyldy, álemdik naryqtaǵy kúrdeli jaǵdaıǵa qaramastan, táýir ekonomıkalyq kórsetkishtermen qorytyndyladyq.
Aýa raıy qolaısyz, qýańshylyqty bolǵanymen, salystyrmaly túrde, aldyńǵy jylǵa qaraǵanda ósimdik sharýashylyǵynda joǵary ónim alyndy. Sýarmaly egis ulǵaıyp, malazyǵyndyq alqaptardaǵy túsim ulǵaıdy.
Qazir aýdandaǵy iri agroónerkásiptik qurylymdar, sharýa qojalyqtary jańa jyldyń ónimine negiz qalaýǵa kirisip ketti. Egis alqaptarynda qysqy agrotehnıkalyq sharalar qolǵa alynyp, yjdaǵatty júrgizilýde. Elbasy maqalasynda aıtylǵan tapsyrmalardy oryndaýdyń berik negizi búginnen qalanýda.
Kim-kimniń de ilgeri kúnge úmitpen qaraıtyny shyndyq. Oǵan álemniń damyǵan otyz eliniń qataryna enýge baǵyt ustap otyrǵanymyz da umtyldyrady. Bul ánsheıin aıtyla salǵan áńgime emes, jan-jaqty zerttelip, baǵdarlamalyq baǵyttary aıqyndalǵan meje. Álemdik qarjy daǵdarysy jaǵdaıynda qol jetken tabystardan taban taıdyrmaı, ilgerileýge iz ashatyn Elbasynyń «Bes ınstıtýttyq reforma – 100 naqty qadam» Ult Josparyn alǵa tartýy buǵan sendire túsken-di. Endi mine, «Ult Jospary – qazaqstandyq armanǵa bastaıtyn jol» maqalasynda Memleket basshysy bul baǵdarlamanyń baıandylyǵyn qamtamasyz etetin qadamdardy praktıkalyq júzege asyrýdyń negizgi túıinderin tarqatyp berdi. Baǵdarlama bar, basym baǵyttar aıqyndaldy, olardy júzege asyrý úshin ne isteý kerektigi «soqyrǵa taıaq ustatqandaı» alǵa tartyldy. Endigi másele jumyla iske kirisýge, irkilmeı eńbek etýge kelip tireledi der edim. Bul baǵytta árbir qazaqstandyq ózindik úles qosatyndaı sharýa tyndyrsa, elimizdiń daǵdarysty eńserip qana qoımaı, damýǵa serpin bereri sózsiz.
Elbasy Nursultan Nazarbaev bes ınstıtýttyq reformany júzege asyrý jónindegi keńeste reformalardy kózboıaýshylyqqa aınaldyrýǵa jol berýge bolmaıtynyn qatań eskertken bolatyn. Jańa zańdar qabyldanyp, birqatar qurylymdar men júıelerge ózgerister engizildi. Tek osy uly maqsat jolynda memleketti, ekonomıka men qoǵamdy damytý úshin qaǵıdatty jańa quqyqtyq orta qalyptastyratyn 59 zań kúshine engen eken. Munyń ózi daǵdarysta da damýǵa baǵyt ustaǵan elimizdiń kúrdeli kezeńnen qysylmaı ótetinine sendire túsedi. Buǵan árqaısymyzdyń atsalysýymyz azamattyq paryzymyz bolmaq. Al, Ult Josparyn praktıkalyq júzege asyrý – qoǵamdyq damýdaǵy oń ózgeristerdiń bastaýy bolatynyna senim mol.
Shamıl SARINOV,
Mártók aýdandyq aýyl sharýashylyǵy bóliminiń basshysy.
Aqtóbe oblysy.