«Qazaqstan Táýelsizdiginiń shırek ǵasyry toptasqan halyqtyń ǵana damýdyń tańǵajaıyp shyńdaryna jete alatynyn dáleldep berdi». Elbasy Nursultan Nazarbaev «Ult Jospary – qazaqstandyq armanǵa bastaıtyn jol» dep atalatyn maqalasynda osylaı dedi. Jalpy, qaı sózinde bolsyn Prezıdentimizdiń basa nazar aýdaratyn saıasatynyń biri – el birligi. Onyń móldir bastaýy halqymyzdyń «Birlik bolmaı, tirlik bolmaıdy» degen asyl sózinde jatyr.
Eldiń aýyzbirligi týraly jeti ǵasyr buryn jyraýlar da kúńirengen, «Qalyń elim, qazaǵym, qaıran jurtym», dep keshegi Abaı da ókinip ótken. Abaı óleńderin jatqa oqıtyn Elbasy jaqynda ótken bir kezdesýinde «Birińdi, qazaq, biriń dos, kórmeseń, istiń bári bos» degen aqyn sózin taǵy da mysalǵa aldy. Mysalǵa alyp qana qoıǵan joq, osy sózdi erteńine senimdi elimizdiń ár aýyl, ár qalasynyń kóshelerine jazyp qoıýdy tapsyrdy. О́zim basshylyq etip otyrǵan Jambyl oblystyq gazetiniń «Aq jol» degen «bórkiniń» ústińgi jaǵyndaǵy «Aqyly kópti daý almaıdy, dosy kópti jaý almaıdy» degen sózdi de biz Elbasy saıasatynan týyndatyp qoıǵanbyz. Endi ony gazettiń ár sanynda jarııalanatyn qazaqstandyq dostyq týraly maqalalardyń aıdaryna aınaldyryp, ornyna Elbasy mysalǵa keltirgen ǵıbratty shyǵaryp otyrmyz.
«Bólingendi bóri jeıdi». Júzin jarnamalap, rý attaryn attandap júrgen «sholaq belsendilerge» Abaı aqyly, Elbasy saıasaty sabaq bolsa eken deımiz. Jambyl jeri ejelden ulttyq birlikti sanada saqtaǵan, tatýlyqtyń ordasy bolǵan óńir. San etnostyń ul-qyzyna qut meken bolǵan qazaq dalasynda beıbitshilik pen turaqtylyqtyń saltanat qurýy – Elbasymyz Nursultan Ábishuly Nazarbaevtyń kóregen saıasaty arqasynda júzege asýda. Ortaq Otanymyzdyń basty qundylyqtaryn, asyl murattaryn qurmettep, qasterleý – árbir qazaqstandyqtyń paryzy. Ult bolyp birigip, Elbasynyń aldymyzǵa qoıǵan maqsat-mindetterin júzege asyrý – árbir azamattyń boryshy.
Kósemáli SÁTTIBAIULY,
jazýshy.
Jambyl oblysy.