ASTANA. 11 qańtar. Mordovııanyń 91 jastaǵy turǵyny Elena Vıazovaǵa 1941-1945 jyldar aralaǵynda bolǵan Ekinshi Dúnıejúzilik soǵys pen sovet-japon arasynda bolǵan urysqa qatysqany úshin 70 jyldan soń baryp, áskerı medaldar tapsyryldy. Bul týraly TASS aqparat agenttigine silteme jasaǵan egemen.kz tilshisi habarlady.
«Saltanatty rásim Elena Vıazova turatyn Mordovııa Respýblıkasynyń Elnık eldi-mekeninde ótti. Oǵan «1941-1945 jyldary bolǵan Uly Otan soǵysyndaǵy jeńisi» men «Japonııamen arada kıkiljińdegi jeńisi» úshin eki medal tapsyryldy», – deıdi baspasóz qyzmeti.
Mordovııanyń áskerı komıssary Igor Tıhomırovtyń aıtýynsha, 70 jyl buryn berilýi tıis nagradanyń áli kúnge deıin tapsyrylmaǵanyn ótken jyly Elena Vıazovany jeńistiń 70 jyldyǵymen quttyqtap kelgen kezde ǵana bilgen. Osyǵan deıin ýádeli syılyǵynyń ornyna medaldyń ýaqytsha kýáligin alǵan.
Soǵys jańadan aıaqtalǵan kezderi ardagerlerge jaǵdaıdyń qysyl-taıańyna baılanysty ýaqytsha qaǵazdar taratylǵan. Keıinnen tıesili mydaldary da tapsyryldy. Komıssarıat qyzmetkerleri muraǵattardan izdeý jumystaryn bastady. Osyǵan baılanysty Reseı Federasııasynyń kadr basshylyǵyna suranys jiberdi.
Aımaqtyń áskerı komıssarıat qyzmetkerleri Elena Vıazovanyń osyǵan deıin «Stalıngrad qorǵanysy» medalimen marapattalǵanyn aıtty. Soǵys jyldary nebári 15 jasynda áskerı qatarǵa óz erkimen qosylyp, jasaqqa alynǵan. Stalıngrad shaıqasynan keıin Rjevtegi Úshinshi Belorýstyq frontyna kómektesken. Bul jerden ol fronttyq jolyn Shyǵys Prýssııaǵa deıin jalǵastyrdy. Artynsha, Manchjýrııaǵa da qosyldy. Japonııany jeńgennen soń, jarynyń týǵan aýyly ornalasqan Mordovııaǵa qonys aýdarǵan. Onda ol uzaq jyldar boıy saýynshy bolǵan.
Aıan Ábdýálı.
Derek: TASS.
Sýret: ria.ru.