ASTANA. 19 qańtar. Qazaqstandaǵy birden-bir joǵary oqý orny Almaty qalasyndaǵy Qurlyq áskerleriniń Áskerı ınstıtýty kadrlyq áskerı qyzmetshi desantshylardy túletip shyǵarady. Qazirgi ýaqytta desantshy kýrsanttardy oqytý úshin Áskerı ınstıtýtta jeke kafedra qurý týraly másele qaralýda. Bul týraly egemen.kz tilshisi habarlady.
«Áýe-desanttyq áskerler jáne áskerı barlaý» fakýltetiniń túlekteri Qarýly Kúshter men elimizdiń ártúrli vedomstvolyq qurylymdarynda qyzmet ótkerýde. Olar dene túrǵysyndaǵy júktemelerdi, júıke-psıhıkalyq kúızelis pen oqý-jaýyngerlik qyzmettiń qolaısyz faktorlaryna tózimdi bolyp keledi. Armııamyzdyń jaraqtandyrylýyndaǵy qarý men jaýyngerlik tehnıkany meńgergen.
Oqý kezeńinde ortasha eseppen kýrsant parashıýtpen 21-26 sekirý jasaıtynyn aıta keteıik. Sekirýler QR QK Áýe qorǵanysy kúshteri Áskerı-kóliktik avıasııasynyń An-2, An-12 ushaqtary jáne Mı-8 tikushaǵynan oryndalady.
Dene daıarlyǵy – desantshy ofıserlerdi oqytý men tárbıeleýde mańyzdy jáne ajyramas bólik bolyp sanalady. Sportpen shuǵyldaný jáne sabaqtardy ótkizý úshin ınstıtýtta sport kesheni bar. Onda kýrsanttar gımnastıka, aýyr atletıka jáne qoıan-qoltyq urys boıynsha ózderiniń sheberlikteri men mashyqtaryn shyńdaıdy. Barlyq desantshy kýrsanttar qoıan-qoltyq urys boıynsha kórsetpeli kórsetilimderge qatysady. Sonymen qatar júzý haýyzy bar. Qazirgi sátte ol haýyzda jeńil súńgýirlik kerek-jaraqta súńgýdi pysyqtaý jóninde másele qaralýda.
«Áýe-desanttyq áskerlerdiń taktıkasy», «Áskerı barlaý» oqý páni boıynsha praktıkalyq sabaqtar Qurlyq áskerleri Áskerı ınstıtýtynyń oqý-jattyǵý ortalyǵynda ótkiziledi. О́zge mamandyqtardyń kýrsanttarynan aıyrmashylyǵy oqý-jattyǵý ortalyǵyna barý jáne ınstıtýtqa keri qaraı qaıtý taktıka jáne áskerı barlaý boıynsha oqý suraqtaryn pysyqtaı otyryp, jaıaý júris tártibinde iske asyrylady.
Oqytý baǵdarlamasy adamı desanttyq parashıýtterdi, parashıýttik-desanttyq ydysty jáne áýe-desanttyq daıyndyq jónindegi sabaqtardy ótkizý ádistemesin zerdeleýde negizdeledi. Fakýltet túlegi ártúrli mamandyqtaǵy sarbazdardy parashıýttik sekirýdi oryndaýǵa daıarlaı alady, materıaldyq bólikti biledi, jeke qurammen áýe-desanttyq daıarlyq jónindegi sabaqtardy ótkize alady.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.