«Qazaqstannyń Azamattyq alıansy» ZTB atynan osy birlestiktiń prezıdenti Nurlan Erimbetov «Besinshi shaqyrylǵan Qazaqstan Respýblıkasy Parlamenti Májilisin taratý jáne Qazaqstan Respýblıkasy Parlamenti Májilisi depýtattarynyń kezekten tys saılaýyn taǵaıyndaý týraly» Jarlyqty qoldaıtynyn málimdedi.
«Depýtattardyń kezekten tys saılaý ótkizý týraly bastamasyn Sizdiń qoldaýyńyz elimizdegi demokratııalyq úderister men azamattyq qoǵam ınstıtýttaryn odan ári damytýǵa kezekti márte serpin beretin bolady. 2015 jyly Ult Josparyn júzege asyrý aıasynda ınstıtýttyq reformalardy júrgizý úshin qýatty zańnamalyq arqaý qalyptastyryldy. Ol úkimettik emes uıymdardyń barlyq deńgeıde memlekettik sheshim daıyndaý men qabyldaý jumystaryn uıymdastyrýǵa qatysýyna keń múmkindikter ashady», dep atap kórsetiledi N.Erimbetovtiń málimdemesinde.
Málimdemede, sondaı-aq, atalǵan múmkindikterdi «Qazaqstannyń Azamattyq alıansy» Memleket basshysy usynǵan reformalar men daǵdarysqa qarsy sharalardy júzege asyrý barysyn qoǵamdyq baqylaý kezinde paıdalanýǵa daıyn ekeni atap kórsetiledi.
«Kezekten tys saılaý ótkizý týraly Sizdiń sheshimińizdi mańyzdy jáne ýaqtyly dep sanaımyz jáne Qazaqstan qoǵamyn jańǵyrtý jónindegi barlyq úderisterde belsendi ról atqarýǵa daıyn ekenimizdi bildiremiz. Biz Májilis pen barlyq deńgeıdegi máslıhattar depýtattarynyń saılaýlary turaqtylyqty, azamattyq birlik pen kelisimdi odan ári nyǵaıtýǵa oń yqpal etetinine senimdimiz», delingen «Qazaqstannyń Azamattyq alıansy» prezıdenti N.Erimbetovtiń málimdemesinde.