Saýaldama saılaýdyń qajettiligin kórsetti

Keshe Ortalyq kommýnıkasııalar qyzmetindegi brıfıngte «Qoǵamdyq pikir» zertteý ınstıtýtynyń atqarýshy dırektory Aıgúl Sádýaqasova júrgizilgen saýaldamaǵa qatysqandardyń 96 paıyzy kezekten tys parlamenttik saılaý ekonomıkalyq máselelerdi sheshýge yqpalyn tıgizedi dep sanaıtynyn málim etti. «Bir apta boıy osynaý ózekti máseleni barsha qoǵam talqylap jatyr. Biz respondentterge Májilistiń kezekten tys saılaýyna kózqarasy qandaı ekenin bilýge tıisti suraqtardy qoıdyq. Telefon arqyly jasalǵan suhbatqa 1200 respondent qatysty. Áleýmettik saýaldama Astana, Almaty jáne barlyq oblys ortalyqtaryn qamtydy. Birinshiden, Parlament Májilisiniń kezekten tys saılaýyn ótkizý boıynsha bastama qazaqstandyqtarǵa qalaı áser etip, osy bastamany qalaı qoldap otyrǵandyǵy suraldy. Respondentterdiń 93,6 paıyzy bul bastama ýaqtyly jasaldy dep esepteıdi. Sonymen qatar, 97,2 pa­ıyzy Elbasynyń besinshi shaqyrylǵan Parlament Májilisin taratý jáne Májilis depýtattarynyń kezekten tys saılaýyn taǵaıyndaý týraly sheshimin qoldap otyr», – dedi A. Sádýaqasova. Onyń sózine qaraǵanda, respon­det­terdiń 95,4 paıyzy Ult Josparyn júzege asyrý úshin partııalar saılaý­shy­lar­dyń senim mandatyn alýy kerek ekenin alǵa tartady. Sonymen birge, saýal­damaǵa qatysqandardyń 90 paıyzdan artyǵy kezekten tys saılaý halqy­myz­dyń birligi men toptasa túskendi­gin kórsetetinine senimdi. Bul, qazirgi kúr­deli ekonomıkalyq jaǵdaıda asa qajet, degen pikirlerin bildiripti suralǵandar. Sondaı-aq, saýaldamaǵa qatys­qandardyń 97,2 paıyzy Memleket basshysynyń saýatty, isker jáne eldiń múddesin qorǵaıtyn kandıdat­tar depýtattyqqa usynylýy kerek degen pikirin qoldaıtyndaryn aıt­qan kórinedi. «Qoryta aıtqanda, saýal­damaǵa qatysqandardyń 97,2 paıyzy kezekten tys parlamenttik saılaýdy ótkizý ekonomıkalyq qıyndyqtardy sheshýge yqpalyn tıgizedi dep otyr», – dedi A.Sádýaqasova. Jaqsybaı SAMRAT, «Egemen Qazaqstan».