QARAǴANDY. 23 qańtar. Qaraǵandydaǵy S. Sápıev atyndaǵy boks ortalyǵynda Búkilálemdik boks serııasynyń altynshy maýsymy saltanatty túrde ashyldy. Bul týraly egemen.kz tilshisi habarlady.
Bul kúni sharshy alańnyń tórinde qos komanda «Astana Arlans» pen «Baký Faırs» shyn myqtyny anyqtady. Eki komanda arasyndaǵy tartysty kezdesýler 4:1 esebimen qazaqstandyq bylǵary qolǵap sheberleriniń paıdasyna sheshildi.
«Astana Arlandary» klýbyna alǵashqy jeńisti 49 kılo salmaqtaǵy Temirtas Júsipov ákeldi. Ol óziniń qarsylasy Djavıd Dadashovtan 3:0 (50:45, 50:45, 50:45) esebimen basym tústi. Budan keıin rıngke kóterilgen Meıirbolat Toıtov 56 kılo salmaq dárejesinde Iаrash Magomedovti betqaratpaı jeńdi – 3:0 (49:44, 50:43, 49:44). 91 kıloda bolǵan úshinshi – sheshýshi jekpe-jekte Erkin Muhamedjan qarsylasy Hadj Mýrtýzalıevti upaı sanymen utyp, astanalyq jartylaı kásipqoı klýbqa jalpykomandalyq jeńisti syıǵa tartty.
Jalpy esepke ózgeris engize almaıtyn tórtinshi jekpe-jekte jerlesimiz Ashat Ýálıhanov (64 kg) Gaıbatýlla Gadjıalıevten 0:3 (47:48, 46:49, 47:48:47) esebimen utylyp qaldy.
Al sońǵy jup – 75 kılo salmaqtaǵy Meıirim Nursultanov pen Badrı Hardzıanı arasyndaǵy aıqas 3:0 (49:46, 50:45, 50:44) esebimen bizdiń boksshynyń jeńisimen aıaqtaldy.
Qaırat Ábildınov.
Sýret, derek: egemen.kz.