ASTANA. 29 aqpan. Memleket basshysy «Qazaqstan temir joly» ulttyq kompanııasy» AQ prezıdenti Asqar Mamındi qabyldady. Bul týraly akorda.kz habarlady.
Asqar Mamın Elbasyǵa «QTJ» UK» aksıonerlik qoǵamynyń 2015 jylǵy qyzmetiniń nátıjeleri men bıylǵy josparlary, sondaı-aq, ulttyq kompanııa operatorlyq etetin «Nurly jol» baǵdarlamasynyń ınfraqurylymdyq jobalaryn júzege asyrý barysy týraly baıandady.
Memleket basshysy Qazaqstannyń tranzıttik jáne eksporttyq áleýetin júzege asyrý úshin kólik-logıstıka keshenin damytýdyń, ekonomıkany ártaraptandyrýdyń, jańa jumys oryndaryn ashýdyń jáne jıyntyq ishki ónimdi ulǵaıtýdyń mańyzdylyǵyn aıtty.
Qazaqstan Prezıdenti ınfraqurylymdyq jobalardy júzege asyrý jáne eksportqa baǵyttalǵan joǵary tehnologııalyq óndiristerdi damytý eldiń ekonomıkalyq saıasatynyń basymdyǵy bolyp sanalatynyna nazar aýdardy.
Asqar Mamın avtomobıl jáne temirjol magıstraldaryn qaıta jóndeý, Kaspııdegi port ınfraqurylymyn jańǵyrtý, «Qorǵas» halyqaralyq shekaralyq yntymaqtastyq ortalyǵy men arnaýly ekonomıkalyq aımaqty damytý jónindegi jumystar kestege sáıkes iske asyrylyp jatqanyn aıtty.
«Qazaqstan temir jolynyń» prezıdenti 2015 jyly «Borjaqty-Ersaı» temirjol jelisi paıdalanýǵa berilgenin, «Qorǵas – Shyǵys qaqpasy» arnaýly ekonomıkalyq aımaǵynyń «qurǵaq porty» iske qosylǵanyn, Aqtaý portynda jańa nysandar, Astana qalasynda Ortalyq Azııadaǵy iri kólik-logıstıka ortalyǵy jumys isteı bastaǵanyn málimdedi.
Sonymen qatar, jyl aıaǵyna deıin Mańǵystaý oblysyndaǵy Quryq portynda parom kesheniniń, «Almaty-1 – Shý» temirjol ýchaskesinde ekinshi baǵyttyń qurylysyn aıaqtaý, al EKSPO-2017 kórmesiniń ashylýy qarsańynda elorda áýejaıynyń halyqaralyq termınaly men jańa temirjol vokzalynyń qurylysyn bitirý josparlanyp otyr.
Asqar Mamın sondaı-aq, kompanııa qyzmetti jetildirý jáne shyǵystardy qysqartý baǵdarlamasyn júzege asyryp jatqanyn, onyń ekonomıkalyq tıimdiligi 2015 jyly 169 mıllıard teńge bolǵanyn aıtty.
Kompanııanyń jańa ókilettikterdi damytý jáne konteınerlik poıyzdar qyzmetin ilgeriletý baǵytyndaǵy jumystary Qytaı men Eýropa arasyndaǵy tranzıttik konteınerlik júk aǵynyn 2014 jylmen salystyrǵanda, byltyr eki esege ulǵaıtýǵa, al tranzıttik tasymaldan túsetin tabystyń úlesin 28 paıyzǵa jetkizýge múmkindik bergen.
Memleket basshysy kezdesý qorytyndysy boıynsha birqatar naqty tapsyrma berdi.
Elaman Qońyr.
Derek, sýret: akorda.kz.