Aqtóbelik Konstantın Pashaevtyń shaǵyn sheberhanasyn qolóner buıymdarynyń kórmesi deýge bolady. Ol sońǵy on jyldyń ishinde qaldyq aǵashtardan 200-den astam músin jasap shyǵarǵan. Sheber jasaǵan kádesyılar dostary men kórshileriniń kóńilderinen shyǵyp júr. Sondaı-aq, aǵash ustasy ózi qashap, jelimdep jasaǵan músinderden kolleksııa jasaýdy da umytpaıdy. Kezinde qurylys salasynda eńbek etken Konstantın Georgıevıch atalǵan buıymdardy jasaýǵa negizinen jemis-jıdek salatyn aǵash jáshikterin paıdalanady. Onyń qolyna túsken aǵashtar ómirge ekinshi ret joldama alyp, basqa túrge enip, ásem músin bolyp shyǵa keledi.
Aǵash músinder ıdeıasy da aıaq astynan oıyna sap ete túsedi. Jańalyqtardan elimizde erli-zaıyptylar arasynda ajyrasýlar kóp ekenin estip edi, sheksizdik sımvolyn jasaı qoıdy. Kezekti kitapty paraqtap otyryp, onyń basty keıipkerlerin jasaýǵa kóńili ketti. Elimizdiń Kedendik odaqqa kirgenin estisimen, Qazaqstannyń, Reseıdiń jáne Belarýstiń memlekettik týlarymen órnektelgen aǵash músini paıda boldy. Mine, qart aǵash sheberi jasaıtyn músinderdiń negizgi jelisi osylaı týyp jatady.
Seksenniń seńgirinen asqan sheber áreketsiz otyra almaıdy, qashanda qolynan arasy men qashaýy túspeıdi. Kánigi qurylysshy retinde barlyq aǵashtardyń sapasyn da bir kisideı ajyrata alady. Al músinder jasaýǵa qajetti jemis-jıdek salatyn aǵash jáshikterin aǵashtan túıin túıgen qartqa taıaý mańdaǵy dúkenderdiń ózderi usynady. Olardy keptiredi, kesedi, shıkizat daıyndaıdy, sodan keıin ózine qajetti kompozısııany jınaıdy.
– Sońǵy jyldary shıkizat tabý qıyndap ketti. Sebebi, shetelden jetkiziletin jemis-jıdekter burynǵydaı aǵash emes, plastık jáshiktermen ákelinedi. Alaıda, shıkizat qorym ázirge jetedi. Eń bastysy, aǵashtan qııýlastyryp jasaǵan kádesyılarym adamdarǵa unasa bolǵany. Men ár músindi shyn júregimmen berilip jasaımyn, – deıdi Konstantın Pashaev.
Zeınetke shyqsa da, eńbekten qalmaǵan qarttyń bul qadamy tek ózin ǵana qanattandyryp qoımaıdy, aınalasyndaǵylarǵa da qýanysh syılaıdy. Sondyqtan bolar, ol qolynan shyqqan músinderdiń kóz tartarlyq bolýyna kóp kóńil bóledi.
Satybaldy SÁÝIRBAI,
«Egemen Qazaqstan».
Aqtóbe oblysy.