Keshe Astanada «Saılaý úderisindegi qoǵamdyq ınstıtýttar: baıqaý jáne járdemdesý» taqyrybynda dóńgelek ústel otyrysy ótkizildi. Otyrys tóraǵalyǵynyń tizginin ustaǵan Saılaýdy baıqaý jónindegi respýblıkalyq qoǵamdyq komıssııanyń tóraǵasy Nurlan Erimbetov alǵashqy sóz kezegin qoǵamdyq komıssııa múshesi Kamal Burhanovqa usyndy.
Halqymyzdyń uzyna boıǵy tarıhyn kókteı sholyp, jurtshylyqqa oı tastaı sóılegen qoǵam qaıratkeri: «Men AQSh-tyń burynǵy Memhatshysy Kondalıza Raıspen kezdeskende men ol kisige
saýal qoıdym. «Sizder jer júzine demokratııa qaǵıdattaryn úıretkilerińiz keledi. Al Kolýmb Amerıkany ashpaı turyp-aq bizdiń halqymyzdyń handaryn aq kıizge kóterip saılaǵanyn, eshkimnen taısalmaıtyn, týǵanyna tartpaıtyn bıler ınstıtýty bolǵanyn bilesizder me?», dep suradym. Rasynda, bizdiń halyqtyń dalalyq demokratııasynyń tamyry tereńde jatyr. О́tken jyly Qazaq handyǵynyń 550 jyldyǵyn toılaǵanda ony keıbireýler Qazaq memleketine 550 jyl degileri keldi. Joq, qazaq memleketiniń tarıhy sonaý baǵzyda, saqtarda jatyr. Altyn adamdy BUU-da kórmege qoıǵanda «Saq jaýyngeri b.z.d. V ǵasyr» dep jazypty. Sonda men elshiliktiń azamattaryna aıttym: «Nege tek bulaı dep jazdyńyzdar? Muny biz bilemiz, al ózge qurlyqtan kelgen elshi saqtyń kim ekenin qaıdan biledi. Bul bizdiń hanzadamyz ekenin ashyp jazý kerek», dedim. О́z tarıhyn tereń bilgen el adaspaıdy, ózgeniń qoljaýlyǵy da bolmaıdy. Qazaq demokratııasy qazirgideı jáshikke qaǵaz salyp, saılaý ýchaskelerin quryp daýys bermegenimen, ádildikti tý etken saılaý ótkizgen. Bizdiń qazirgi qalybymyz sol durys joldyń jalǵasy», – dep oı qorytty.
Keńestiń endigi bir múshesi Marat Báshimov saılaýaldy úgit-nasıhat kezinde eshbir alalaýdyń oryn almaǵanyn, elektorattyń qaı partııaǵa da qatysty málimetterge tolyqqandy qanyqqanyn aıtsa, akademık Jabaıhan Ábdildın: «Qazaqstan áý bastan demokratııalyq joldy tańdady. Qoǵamnyń árbir azamaty erkin. Ár adamnyń saılaýǵa, saılanýǵa, bılikke umtylýyna jol ashyq. Bıliktiń úsh tarmaǵynyń árqaısysy zań aıasynda ózine berilgen ókilettiligin atqarady. Bizdiń barlyǵymyzdyń erkindigimiz zańymyzda aıshyqtalǵan. Osylardyń ishinde qoǵamnyń durys jolda damýynda zań shyǵarý bıliginiń orny aıryqsha. Sebebi, qoǵamdy ilgeriletetin de, keri ketiretin de zań. Demokratııalyq qoǵamda zań bıligi ústem. Saılaý bizdi osy baǵytta júrgizip, elimizdi máńgilik maqsattarǵa jeteleıdi», – dedi.
Dóńgelek ústelge qatysýshylar kózqarastaryndaǵy, ıdeıalaryndaǵy, pikirlerindegi, múmkindikterindegi erekshelikterine qaramastan, barlyq saıası partııalardyń ashyq jáne básekeli kúreske birdeı deńgeıde qoljetimdi bolýyna qoǵamdyq komıssııanyń ár múshesiniń aıanbaǵanyn aıtty. Barlyq zańnamalardyń múltiksiz oryndalýyn, normalar men sharttardyń buzylmaýyn baqyladyq. Usaq-túıek degen joqpyz, barlyǵyna mán berip, saılaýaldy jumystardyń barlyǵynyń zańǵa sáıkes ótýine jiti qaradyq, endi naq jaýapty kezeń – saılaý tym taıaý. Jumysymyzdy aıaǵyna deıin atqaryp, árbir saılaý ýchaskesinde daýys berý prosedýrasyn qadaǵalaıtyn bolamyz, dedi olar.
Munymen qosa, otyrysta qoǵamdy demokratııalandyrý úderisinde qoǵamdyq baıqaýshylar ınstıtýtynyń belsendi qımyl jasaýy erteńgi jarqyn kúnniń kepili degen komıssııa músheleri baıqaýshylar qyzmetindegi quqyqtyq jáne tájirıbelik aspektilerge de nazar aýdardy.
Anar TО́LEÝHANQYZY,
«Egemen Qazaqstan».