ASTANA. 6 sáýir. Volkswagen avtokonserni Qytaıda taraǵan aqaýy bar 104 myń kólikti keri shaqyrdy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady.
Kompanııa basshylyǵy 2010 jyldyń 12 qańtary men 2016 jyldyń 19 qańtary aralyǵynda shyqqan Touareg úlgisindegi kólik ıelerine shaqyrý jiberdi. Olardyń aıtýynsha, atalǵan avtomobılderdiń tejegishinde kemshilik paıda bolǵan. AQSIQ habarlamasynda bul olqylyq aldaǵy ýaqytta júrgizýshiniń tejegishti tolyq kúıde basqara almaýyna alyp keletini kórsetilgen. Munyń arty jol apatyna alyp kelýi ábden múmkin.
Aıta keteıik, ótken jyly atalǵan avtokonsern zańsyz túrde qorshaǵan ortaǵa taraıtyn qaldyqtardy azaıtyp kórsetetin qurylǵy ornatqan. Osyǵan baılanysty Eýropanyń jáne Azııanyń birqatar elderi iri kólemde aıyppul saldy. Al AQSh-tyń Nıý-Meksıko shtaty alǵash bolyp kompanııanyń bul isin sotqa berdi.
Aıan Ábdýálı.
Derek, foto: TASS.