ASTANA. 6 sáýir. Sırııanyń Aleppo qalasyndaǵy Sheıh-Maksýd aýdanynda lańkesterdiń áreketinen 14 beıbit turǵyn mert boldy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady.
Sodyrlar atalǵan aımaqty zymyranmen atqylaǵan. Saldarynan úsh turǵyn úı qırap qaldy. Terrorlyq shabýyldan taǵy 50-den astam adam túrli deńgeıde jaraqat alyp, aýrýhanalarǵa jetkizildi. Qaza tapqandardyń sany áli de artýy múmkin degen boljam bar. Qazirgi kezde oqıǵa ornynda qutqarýshylar toby qyzmet etýde.
Lańkestik áreketti kimderdiń jasaǵany ázirge belgisiz. Alaıda, kýágerlerdiń aıtýynsha, bul jolǵy qandy iske «Djebhat an-Nýsra» uıymynyń qatysy bolýy múmkin.
Aıta keteıik, osy jyldyń aqpan aıynyń sońyna taman Bashar Asad úkimeti men oppozısııalyq kúshterdiń arasynda beıbit kelisim ornaǵan. Alaıda, bul kelisimniń atalǵan lańkestik uıymǵa esh qatysy joq. Osyǵan baılanysty ótken aıda úkimet áskeri arnaıy operasııa kezinde júzge jýyq ekstremıstiń kózin joıǵan.
Aıan Ábdýálı.
Derek: RIA «Novostı».
Foto: 24.kz.