Astananyń Jastar teatrynda Táýelsizdigimizdiń 25 jyldyǵyna arnalǵan «Til tuǵyry – el tuǵyry» atty merekelik sazdy kesh ótti.
Qazaqstan halqynyń birligi kúni qarsańynda uıymdastyrylǵan is-sharanyń uıytqysy qalalyq til basqarmasynyń basshysy Tileýǵalı Qyshqashbaev kópshilik aldynda sóılegen sózinde bul baǵdarlamanyń basty maqsaty ata-babalarymyz ǵasyrlar boıy ańsap, búgingi urpaq qol jetkizgen azattyǵymyzdy, egemen elimizdiń baǵa jetpes baılyǵy – ultaralyq tatýlyqty ulyqtaý ekendigin, osy oraıda memlekettik tilimizdiń mártebesin ósirýge aıryqsha mán berilip otyrǵandyǵyn, óıtkeni, týǵan tilimizdiń tuǵyryn bıiktetý eldigimizdiń ajyramas bóligine aınalǵanyn atap kórsetti.
Kórermen kóńilinen shyqqan konsertte Ardaq Balajanova, Tamara Asar, Anar Muzdahanova, Ibragım Eskendir sekildi sahna sańlaqtary án shyrqap, kúı kúmbirletti. Jınalǵan jurt, ásirese, Shahrızat Seıdahmet, Eldana Gaberman jáne Tatıana Kım úsh tilde oryndaǵan kórnekti kompozıtorymyz Shámshi Qaldaıaqovtyń ánderin óte jyly qabyldady.
Talǵat BATYRHAN,
«Egemen Qazaqstan»