Kókshetaýda polıseılerge shabýyl jasaǵan eki kúdikti ustaldy

KО́KShETAÝ. 21 mamyr. Aqmola oblysynyń ortalyǵynda polıseılerge shabýyl jasady degen kúdikpen eki adam ustaldy. Bul týraly oblystyq ishki ister departamenti baspasóz qyzmetiniń deregine súıengen egemen.kz tilshisi habarlady. Kúdiktiler uıymdasqan qylmysqa qarsy kúres basqarmasynyń jedel ýákilderine shabýyl jasady delinip otyr. Olar qara-kók tústi VAZ-21014 markaly avtomashınamen kelip, quqyq qorǵaý qyzmetkerleriniń birine pyshaq urǵan. Sodan soń oqıǵa ornynan qashyp ketken. Ustalǵandar Kókshetaý qalasynyń 1984 jáne 1985 jyldary týǵan turǵyndary bolyp shyqty. Olardyń biri buryn sotty bolǵan. Osyǵan deıin bul ekeýi jasyryn qarý jasaýmen aınalysyp kelgen. «Syrttan vıdeobaqylaý kameralarynyń kómegimen atalmysh ýchaskeden osy ýaqytta ótken kólikterdiń bári muqııat tekserildi. Osynyń nátıjesinde kúdiktilerdiń qylmys jasap bolǵannan keıin oqıǵa ornynan boı jasyryp, kólikterin Býrabaı aýdanyna, taýdyń arasyna aparyp, jasyryp qoıǵany anyqtaldy. Sol jaqtan ózderi qalaǵa qaıtqan. Qazir kúdiktiler qolǵa tústi. Olar ýaqytsha ustaý oqshaýlaǵyshynda otyr», - dedi oblystyq ishki ister departamentiniń baspasóz hatshysy Gúlnar Pınchýk. Baqbergen Amalbek. Derek: Aqmola oblystyq ishki ister departamentiniń baspasóz qyzmeti.