ASTANA. 22 mamyr. Keshe túnde Reseıdiń eki qalasynda ótip jatqan hokkeıden álemniń 80-shi chempıonatynyń jartylaı fınaldyq oıyndary oınaldy. Máskeýde saıys qyzdyrǵan eki matchtyń qorytyndysynda Fınlıandııa men Kanadanyń fınalǵa shyqqany belgili boldy. Bul týraly «R-Sport» aqparyna súıengen egemen.kz tilshisi habarlady.
Osylaısha budan 9 jyl buryn Máskeýde ótken álem chempıonatynyń fınaldyq juby taǵy qaıtalandy. Reseı astanasynda osynyń aldynda, 2007 jyly jalaý kótergen jahandyq jarysta da Fınlıandııa men Kanada altyn medal úshin kúsh synasqan edi.
Bul jolǵy jartylaı fınalda Fınlıandııa Reseıdi 3:1 etip utsa, Kanada asa tartysty ótken matchta AQSh-ty 4:3 esebimen tize búktirdi.
Muz aıdynyna aldymen Reseı jáne Fınlıandııa quramalary shyqty. Reseılikter osymen qatarynan úshinshi chempıonat medal jeńip alýǵa qadam basty. О́tken jyly olar Pragada kúmis júldeni qanaǵat tutsa, burnaǵy jyly Mınskide altyn júldeger atanǵan edi.
Reseı – Fınlıandııa 1:3 (1:0, 0:3, 0:0)
Goldar: Sergeı Shırokov 1:0 (3-mınýt), Sebastıan Aho 1:1 (26), Iýsı Iokınen 1:2 (36), Sebastıan Aho 1:3 (39).
Oıynda birinshi bolyp reseılikter esep ashty. Ony 3-mınýtta Sergeı Shırokov túsirdi. Biraq osydan keıin chempıonat ıeleri bar tizginnen aırylyp qaldy. Bıylǵy chempıonatty óte jaqsy qarqynda, joǵary deıgeıde ótkizgen, óz tobynda tipti Kanadanyń ózin 4:0 etip utyp ketken Sýomı bul birinshilikke óziniń óte jaqsy daıyndyqpen kelgenin osy kezdesýde de baıqatty. Fınder oıynnyń taǵdyryn ekinshi kezeńde birjola sheship ketti. Sóıtip, fınalǵa emin-erkin ótti.
Endi aqtyq aıqasta Fınlıandııa jeńis tuǵyrynan kórinse, buryn-sońdy bolmaǵan bir rekordqa qol jetkizger edi. Ázirge álemniń jastar arasyndaǵy da, eresekter arasyndaǵy da chempıonattaryn utyp alǵan birde-bir el joq. Mine, fınder sol rekordqa jaqyn tur. Osynyń aldynda olardyń jastar komandasy álemde top jarǵan. Sol qurama sapynda óner kórsetken Mıkko Rantanen (19-da), Sebastıan Aho (18) jáne Patrık Laıne (18) sekildi jas hokkeıshiler endi eresekter jarysyna da qatysyp jatyr. Sonyń ishinde Aho Reseımen oıynda sheshýshi tulǵa bola bildi.
Túnniń jarymy aýa alańǵa Amerıka qurlyǵynyń eki komandasy bettedi. AQSh quramasy osy joly utylyp, 3-oryn úshin talasta qarsylasynan basym tússe, sońǵy 4 jylda úshinshi ret qola júldeger atanar edi. Buǵan deıin bul qurama 50 jyl ishinde eki-aq ret qola medal jeńip alǵan eken. Al fınalda hokkeıdiń ıeleri jeńiske jete qoıǵan jaǵdaıda onyń kapıtany Korı Perrı Olımpıada men álem chempıonatynda jeńiske jetken, sondaı-aq Stenlı Kýbogyn utqan oıynshylarǵa arnalǵan «Úsh dúrkin altyn» klýbynyń 28-shi múshesi atanady.
Kanada – AQSh 4:3 (2:0, 1:3, 1:0)
Goldar: Brenden Gallaher 1:0 (9-mınýt), Bred Marshan 2:0 (19), Oston Mettıýs 2:1 (22), Davıd Vaorvskı 2:2 (24), Taıler Mott 2:3 (29), Derek Brassar 3:3 (36), Raıan Ellıs 4:3 (42).
Match birden Úıeńki japyraǵy eli quramasynyń qaýyrt shabýylymen bastaldy. Soǵan oraı olar tez alǵa da shyǵa bildi. Birinshi kezeńniń sońynda esep sondyqtan 2:0 bolyp, kanadalyqtardyń paıdasyna sheshilip turdy. Biraq AQSh-tyń quramynda 6 stýdent oınaıtyn jas komandasy buǵan asa kóp qaımyǵa qoıǵan joq. Olar ekinshi kezeńde bas-aıaǵy 7 mınýttyń ishinde eki shaıba aıyrmashylyǵyn jaýyp, alǵa da shyǵyp ketti. Buǵan kanadalyqtar sońǵy sátterde bir shaıbamen jaýap qaıtaryp, kezeńdi teńge jetkizdi. Olar sońǵy kezeńniń basynda taǵy bir shaıba salyp, tarazy basyn ózderine qaraı birjola aýdaryp aldy.
Sonymen, búgin álem chempıonaty óziniń máresine jetedi. Aldymen Reseı jáne AQSh quramalary qola medaldiń taǵdyryn sheship alady. Sodan keıin altyn medal úshin kúreske Fınlıandııa men Kanada kirisip ketedi.
Esterińizge sala keteıik, bul chempıonatqa ótken jyly birinshi dıvızıonda utqannan keıin Qazaqstan quramasy da qatysqan edi. Bizdiń hokkeıshiler Shveısarııamen ótkizgen birinshi maýsymashar matchta 3:2 esebimen býllıtte jeńiske jetti de, qalǵan oıyndardyń bárinde pyrdaı bolyp utylyp shyqty. Nátıjesinde Máskeýde tý tikken A tobynda 2 upaımen eń sońǵy orynda qalyp, toptap shyǵa almady. Sonymen birge birden birinshi dıvızıonǵa túsip qalǵan bolatyn.
Talǵat Raıymbek.
Derek: R-Sport, foto: Sovetskıı sport.
