ASTANA. 22 mamyr. Búgin – Reseıde ótip jatqan hokkeıden álem chempıonatynyń sońǵy jarys kúni. Jańa ǵana úshinshi oryn úshin bolǵan oıyn aıaqtalyp, AQSh-tan 7:2 esebimen basym túsken Reseı quramasy tarıhynda 3-ret álemdik dodanyń qola júldesine qol jetkizdi. Bul týraly egemen.kz tilshisi habarlady.
Bilikti maman Oleg Znarok jattyqtyratyn Reseı quramasy bul kezdesýge erekshe daıyndyqpen shyqty. Oıynnyń 7-mınýtynda Vıacheslav Voınov esep ashyp, komandasyn alǵa shyǵarǵan bolatyn. Arada taǵy 7 mınýt ótkende, reseılikter oıynshy basymdyǵyn júzege asyryp, Sergeı Mozıakınniń kómegimen esepti eseledi.
Ekinshi kezeńde qarqynyn kúsheıtken aıdyn ıeleri qarsylastarynyń qaqpasyna taǵy da úsh shaıba soqty. Aldymen, 30-mınýtta Ivan Telegın mergendigimen kózge tússe, 33-mınýtta Evgenıı Dadonov esepti 4:0-ge jetkizdi. Osyǵan deıin qansha shabýyldasa da sáttilik jetispegen amerıkalyqtar 35-mınýtta ǵana Reseıdiń qorǵanysyn buzyp ótip, Sergeı Bobrovskıı qorǵaǵan qaqpadan sańylaý tapty. Komandasynyń oıynyna qan júgirtip, nátıjeli soqqysymen kózge túsken Frenk Vatrano bolatyn. Osy rette AQSh hokkeıshileri bir oıynshylary kem bolǵanyna qaramastan, gol soǵyp ketkenin aıta ketken jón.
Desek te, amerıkalyqtardyń bul golyna Reseı oıynshylary lezde jaýap qaıtardy. Atap aıtqanda, 36-mınýtta Artemıı Panarın reseılikterdiń osy kezeńdegi úshinshi shaıbalaryn soqty.
Alǵashqy eki kezeńde qaqpasyna bes birdeı shaıba jibergen AQSh qaqpashysy Keıt Kınkeıdti úshinshi kezeńde Maık Kondon almastyrdy. Degenmen, quramanyń bas jattyqtyrýshysy Djon Haınstyń bul áreketi oıyn barysyna eshqandaı ózgeris ákelmedi. 44-mınýtta Frenk Vatrano dýbldiń avtory atanyp, amerıkalyqtar jınalǵandaı áser tanytqan. Alaıda, oıyn sońyna deıin qarqynyn báseńdetpegen Reseı quramasy Kondondy da eki ret óz qaqpasynan shaıba alyp shyǵýǵa májbúr etti. Naqty aıtsaq, 54-mınýtta Sergeı Mozıakın ekinshi ret mergendigimen tanylsa, 60-mınýtta Vadım Shıpachevtiń mereıi ústem boldy.
Osylaısha, óz jerinde ótken álem chempıonatyn Reseı quramasy úshinshi orynmen aıaqtady. Buǵan deıin bes márte álemdik dodanyń qola júldesine talasqan soltústiktegi kórshimiz sonyń ekeýinde, ıaǵnı 2005 jáne 2007 jyldary úzdikter qatarynan kóringen bolatyn. Al AQSh quramasy osymen 8-ret jubanysh fınalda baq synap, sonyń tórteýinde qarsylasyna jol berdi.
Aıta keteıik, dál qazir Reseı astanasy – Máskeý qalasyndaǵy VTB muz aıdynynda álem chempıonatynyń fınaldyq kezdesýi ótýde. Onda Fınlıandııa quramasy men Kanada «altynǵa» talasýda. Fınnder jartylaı fınalda Reseıden 3:1 esebimen basym tússe, úıeńki japyraqty eldiń ókilderi atalǵan synda 4:3 esebimen AQSh-ty artta qaldyrǵan bolatyn.
Bul saıysqa Qazaqstan quramasynyń da qatysqanyn buǵan deıin habarlaǵan edik. «A» tobynda synǵa túsken bizdiń jigitter betashar oıynda býllıt arqyly Shveısarııany jeńip, sensasııa jasady. Degenmen, qalǵan alty oıynnyń bárinde jeńilgen Andreı Nazarovtyń shákirtteri álem chempıonatynyń elıtalyq dıvızıonymen qosh aıtysty.
Elaman Qońyr.
Derek: egemen.kz.
Foto: championat.com.
