Professor atap ótkendeı, búgingi Qazaqstan klımattyq syn-qaterlerdi jańa múmkindikterge ushtastyryp, ekonomıkalyq ósim men jańa jumys oryndaryn qalyptastyrýda ozyq úlgi kórsetip otyr.
− «Sátbaev oqýlary» «Klımattyń ózgerýiniń saldaryn beıimdeý jáne azaıtýǵa arnalǵan tehnologııalar men ınnovasııalar» taqyrybyn arqaý ete otyryp, ǵylym, memleket jáne bıznes ókilderin ortaq maqsatqa jumyldyrdy. Bul turaqty bolashaqqa bastar naqty sheshimder izdeıtin mańyzdy alańǵa aınaldy. Qazaqstan men Sátbaev ýnıversıtetiniń turaqty damý máselelerine aıryqsha mán berýi meni erekshe áserge bóledi, − dedi Rae Kvon Chýn.
Qazaqstan «jasyl» ekonomıka qaǵıdattaryn erte qabyldap, «Jasyl kópir» bastamasyn usynǵan alǵashqy elderdiń biri. Búginde bul baǵyt naqty nátıjesin berip, klımattyq kún tártibi ekonomıkalyq damýdyń qýatty tetigine aınalyp otyr.
«Turning Net-Zero into Growth and Job Creation Opportunities» atty negizgi baıandamasynda sarapshy kómirtektik beıtaraptyqqa kóshý tek ekologııalyq jaýapkershilik emes, sonymen birge ekonomıkany jańǵyrtýdyń, jańa tehnologııalardy engizýdiń mańyzdy draıveri ekenin atap ótti. Ásirese ýnıversıtetterdiń bolashaq mamandardy daıarlaýdaǵy jáne turaqty damý sheshimderin qalyptastyrýdaǵy aıryqsha róline toqtaldy. Konferensııanyń basty ıdeıasy – klımattyq syn-qaterlerge tıimdi jaýap berý ǵylym, memleket jáne bıznes arasyndaǵy tyǵyz áriptestiktiń nátıjesi. Bul baǵyttarǵa oraı forýmda sóz sóılegen Qanat Erýbaev, Arman Ashkın, Nursultan Qaıynbaev, Nurmuhamed Qartabaev, Qýanysh Omarbekov jáne akademık Asqar Jumadildaev ta óz pikirin bildirdi.
Konferensııa Sátbaev ýnıversıtetiniń ǵylymı jetistikter kórmesimen jalǵasyn tapty. Energetıka, materıaltaný, sıfrlyq tehnologııalar jáne ekologııa salalaryndaǵy tyń ázirlemeler kópshilik nazaryna usynyldy. Sonymen qatar, qonaqtarǵa ýnıversıtettiń ǵylymı-zertteý ortalyqtaryna arnaıy ekskýrsııa uıymdastyrylyp, zamanaýı zerthanalar men ınnovasııalyq ınfraqurylym tanystyryldy. Satbayev International Conference 2026 («Sátbaev oqýlary») taǵy da óz mártebesin aıqyndap, jahandyq máseleler talqylanatyn jáne turaqty bolashaqtyń naqty sheshimderi qalyptasatyn bedeldi halyqaralyq alań ekenin dáleldedi.
ALMATY
