Aýqymdy jıyn Úzdik stýdenttik ınnovasııalyq jobalar kórmesimen bastaldy. Forým ashylýynda zamanaýı tehnologııalardyń múmkindigi keńinen qoldanyldy. Jıylǵandarǵa jasandy ıntellekt arqyly jasalǵan Ábý Nasr ál-Farabıdiń beınerolıgi kórsetilip, uly ǵulamanyń ósıeti men ǵylymı murasy sıfrlyq nusqada qaıta jańǵyrdy. Bul forýmnyń basty maqsaty – ótkenniń asyl qazynasyn bolashaqtyń ınnovasııalarymen sabaqtastyrý ekenin ańǵartty.
Toqaev: Joǵary memlekettik marapattar tizimine «Ál-Farabı» ordeni engiziledi
Sharanyń jabylý rásiminde sóz sóılegen QazUÝ-dyń basqarma tóraǵasy-rektor Janseıit Túımebaev ǵylymnyń el damýyndaǵy strategııalyq mańyzyna toqtalyp, Prezıdent Qasym-Jomart Toqaevtyń ustanymyn jetkizdi:
«Eldiń ıntellektýaldy qýaty tikeleı ǵalymdardyń ıdeıalary men zertteýleri, ǵylymı nátıjeleri arqyly anyqtalady. Ál-Farabı atyndaǵy QazUÝ úshin ǵylym – strategııalyq basymdyq. Biz irgeli jáne qoldanbaly zertteýlerdi damytýǵa, jas ǵalymdardy qoldaýǵa jáne halyqaralyq yntymaqtastyqty nyǵaıtýǵa bar kúsh-jigerimizdi jumsaımyz» dep atap ótti ýnıversıtet basshysy.
Forýmnyń halyqaralyq aýqymy Fransııa, Italııa, Polsha, Qytaı, Túrkııa, Ázerbaıjan jáne Ortalyq Azııa elderinen kelgen 105 sheteldik ǵalymnyń qatysýymen aıshyqtaldy.
Sharanyń basty oqıǵalarynyń biri retinde Islam uıymymen azyq-túlik qaýipsizdigi salasyndaǵy strategııalyq yntymaqtastyq týraly memorandýmǵa qol qoıyldy. Islam uıymynyń azyq-túlik qaýipsizdigi jónindegi bas dırektory Berik Aryn ýnıversıtettiń ǵylymı áleýetine joǵary baǵa berdi:
«Bizdiń uıymǵa 41 memleket múshe, basty maqsatymyz – turaqty aýyl sharýashylyǵyn damytý jáne azyq-túlik qaýipsizdigin qamtamasyz etý. V halyqaralyq Farabı forýmynda jasandy ıntellekt, sıfrlandyrý jáne turaqty damý maqsattarynyń talqylanýy ýnıversıtettiń jahandyq máselelerge belsendi aralasýyn kórsetedi. QazUÝ-dyń zamanaýı zerthanalary men sýperkompıýter qýaty bizdiń halyqaralyq mıssııamyz úshin úlken tirek. Búgingi memorandým osy baılanysymyzdy resmı túrde bekitti», dep málimdedi.
Sonymen qatar mártebeli meıman forým aıasynda ǵylym jolynda alǵashqy qadamdaryn jasap jatqan bir top jas ǵalymdarǵa arnaıy marapattar tabys etti.
Saltanatty shara sheteldik qonaqtardyń quttyqtaý tilegimen jalǵasty. Bolonıa ýnıversıtetiniń (Italııa) professory, BUU-nyń Ortalyq Azııadaǵy eriktisi Roberto Boltrı:
«Bul forým – ǵylym men mádenıettiń toǵysqan núktesi. QazUÝ-dyń álemdik deńgeıdegi zertteý ortalyqtarymen erkin básekelese alatyn áleýeti bar ekenine kezekti ret kóz jetkizdik», dep rızashylyǵyn bildirse, Buhara halyqaralyq ýnıversıtetiniń rektory Sharıf Baratov ekijaqty akademııalyq baılanystardy jandandyrýdyń mańyzdylyǵyna nazar aýdardy.
Forým barysynda Ǵylym qyzmetkerleri kúnine oraı, ýnıversıtettiń oqytýshy-professorlyq quramy men ǵylymı qyzmetkerleriniń eńbegi erekshe atalyp ótti. Akademııalyq ortany damytýǵa qosqan zor úlesi úshin birqatar ǵalymdarǵa arnaıy marapattar berildi.
Jıyn sońynda «QazUÝ úzdik jas ǵalymy» men stýdenttik bıznes-ınkýbatorlar baıqaýynyń laýreattary anyqtalyp, basqosý jeńimpazdardyń qurmetine arnalǵan saltanatty fotosessııamen tamamdaldy.
Dástúrli forým aıasynda úsh halyqaralyq ǵylymı-tájirıbelik konferensııa, dóńgelek ústelder men vorkshoptar serııasy uıymdastyryldy. Sonymen qatar ýnıversıtettiń barlyq fakýltetterinde stýdentter men jas zertteýshilerdiń basyn qosqan «Farabı álemi» konferensııasy ótti. Halyqaralyq platforma qatysýshylarǵa tek ǵylymı izdenisterin tanystyryp qana qoımaı, fılosofııa men bilim salasyndaǵy ózekti máselelerdi talqylaýǵa, ozyq tájirıbe almasýǵa jáne jańa halyqaralyq jobalardyń negizin qalaýǵa jol ashty.
ALMATY
