TALDYQORǴAN. 24 mamyr. Qazaqstan Qorǵanys mınıstri Imanǵalı Tasmaǵambetov búgin Almaty oblysyndaǵy Saryózek garnızonyna ushyp kelip, shuǵyl tekserý jumystaryn júrgizdi. Bul týraly 7sunews.kz aqparyna súıengen egemen.kz tilshisi habarlady.
Qorǵanys mınıstri áskerı bólimde oqý-jaýyngerlik daıarlyq, áskerı bólimderdiń jazǵy oqytý kezeńine ázirligi máselelerin baqylap, merzimdi qyzmettegi áskerı qyzmetshiniń qaza bolý deregi egjeı-tegjeıli talqylady.
Esterińizge sala keteıik, 21 mamyr kúni 12740 áskerı bóliminde park-sharýashylyq kúni ótkizilý barysynda bir qatardaǵy jaýynger qaza tapty. Kún aıasynda bólim, urys mashınalary parkiniń aýmaǵynda, bólimshelerdiń ishinde jumystar uıymdastyrylǵan. Ǵımaratty bólshekteý boıynsha jumystardy oryndaý kezinde qurylystyń bóligi opyrylyp túsedi. Sonyń saldarynan qurylys elementteriniń biri sol mańaıda turǵan 12740 áskerı bóliminiń merzimdi qyzmettegi qatardaǵy jaýyngeri E. Jaqashevtiń ústine qulaıdy. Saldarynan aýyr jaraqat alǵan áskerı qyzmetshi Saryózek kentiniń lazaretinde kóz jumady.
Oqıǵanyń sebepteri joǵaryda atalǵan bólim laýazymdy adamdarynyń áskerı qyzmet ótkerý barysynda qaýipsizdik sharalaryn qamtamasyz etý jónindegi talaptardyń oryndalmaýynan shyǵady.
«Áskerde oryn alatyn qaıǵyly oqıǵalarda qaýipsizdik sharalarynyń buzylýy, baqylaýdyń bolmaýy jáne laýazymdy adamnyń nemquraılyǵy sebepker bolady. Atalǵan fakti boıynsha qylmystyq is qozǵalǵany óte durys jáne barlyq kináli adamdar laıyqty jazalaryn alýy tıis», - dedi qorǵanys vedomstvosynyń basshysy tekserý barysynda.
Tekseris aıaqtalǵannan keıin kadrlyq jáne tártiptik sheshimder qabyldanady.
Nurbol Áldibaev.
Derek, foto: 7sunews.kz.
