ASTANA. 30 mamyr. Qorǵanys mınıstrliginiń delegasııasy Brıýssel qalasyndaǵy NATO-nyń shtab-páterinde seriktestik jáne ujymdyq qaýipsizdik jónindegi komıtettiń otyrysyna qatysty. Bul týraly egemen.kz tilshisi habarlady.
Belgııanyń astanasyna qazaqstandyq delegasııany Qorǵanys mınıstriniń orynbasary general-maıor Talǵat Muhtarov bastaǵan bardy.
NATO-nyń shtab-páterinde 28 eldiń delegasııasy «Josparlaý jáne taldaý úderisi» (JJTÚ) baǵdarlamasyn talqylady. Onda qazaqstandyq áskerıler Soltústik Alıanspen aradaǵy qarym-qatynasqa zor mán beretinin, ekijaqty yntymaqtastyqtyń mańyzdylyǵyn atap ótti. Kezdesýde NATO-ǵa múshe elderdiń ókilderi elimizdiń Qarýly Kúshteriniń bitimgershilik bólimsheleriniń daıarlyǵyna joǵary baǵa berip, 2003 jyldan beri Soltústik Alıans memleketteri bólimsheleriniń qatysýymen ótkiziletin «Beıbitshilik úshin seriktestik» pen «Dala qyrany» bitimgershilik oqý-jattyǵýyn qoldap otyratyndaryn aıtty.
Sapar barysynda general-maıor Muhtarov NATO-nyń bas hatshysy Aleksandr Vershboýmen kezdesti. Kezdesýde ekijaqty yntymaqtastyq, óńirlik qaýipsizdik máseleleri talqylandy.
Dastan Kenjalın.
Derek, foto: Qorǵanys mınıstrligi.
