Ońtústik – ınvestısııa úshin tartymdy aımaq

Investısııa jáne damý mınıstri Áset Isekeshev bastaǵan jumys toby Ońtústik Qazaqstan oblysyna jumys saparymen kelip, ındýstrııalandyrý jáne «Nurly Jol» baǵdarlamalarynyń qalaı júzege asyrylyp jatqan jaǵdaıymen tanysty. Burynǵy fosfor zaýyty aýmaǵynda qurylǵan «Ońtústik» ındýstrııalyq aımaǵy – iri óndiris oryndary sho­ǵyrlanǵan, elimizdi shıkizatqa táýel­dilikten qutqaryp, órkenıetti elder kóshine qosatyn, qýatty Qazaqstannyń bolashaǵyna jasalyp jatqan naqty qadam. Osyndaǵy jumystardy oblys ákiminiń orynbasary S.Tuıaqbaev pen ındýstrııalyq aımaq basqarma dırektory M.Turabekov baıandap berdi. Máselen, 337 gektar aýmaqty alyp jatqan aımaqta 71 iri joba qolǵa alynǵan. Sonyń 39-y jumysyn jolǵa qoıǵan. Indýstrııalandyrý baǵdarlamasy boıynsha tabysty jumys jasap jatqan osy kásiporyndarǵa 95,1 mlrd teńge ınvestısııa tartylypty. Investısııa jáne damý mınıstri aýdan, qalalarda da ashylyp jatqan ındýstrııalyq aımaqtardyń jaı-kúıimen tanysty. Máselen, Uly Jibek jolynyń boıyndaǵy Túrkistan qalasynda 13 jobaǵa 15,1 mlrd teńge salynǵan. Osy qarjydaǵy bıýdjettiń úlesi 907 mln teńge ǵana. Iаǵnı, ońtústiktiń qala, aýdandary ındýstrııalandyrý baǵdarlamasynda tabysty jumystaryn jalǵastyryp keledi. Mınıstrdiń bolǵan kezekti nysany – «Rahat-Shymkent» JShS. Bul jobany zamanaýı eýropalyq tehnologııalardy qoldana otyryp iske asyrǵan – koreıalyq «Lotte» transulttyq kompanııasy. Bul kásiporyn jylyna 8 myń tonna kondıter ónimderin shyǵarady. Munda 150 adam jumysqa ornalastyrylǵan. Bul jobaǵa jumsalǵan reınvestısııa 3 mlrd 200 mln teńgeni quraıdy. – Kásiporyndaǵy jańa óndiristik qýattardy iske qosý DSU aıasynda básekege qabiletti jańa ónim shyǵarýǵa, sondaı-aq, el jurtshylyǵynyń kondıter buıymdarǵa degen suranysyn qanaǵattandyrýǵa múmkindik ashady, – dep atap kórsetti mınıstr. Oblysta ındýstrııalyq damý kór­setkishteriniń barlyq salasynda ósý bar. Bul týraly oblys ákimi B.Atamqulovpen birlesip jumys keńesin ótkizgen Investısııa jáne damý mınıstri aıtty. «Ońtústik Qazaqstan oblysy belsendi jumys isteýde. Shaǵyn jáne orta bıznes te jaqsy damyp keledi. 200-den astam joba bar. Bir bóligi paıdalanýǵa berilgen, bir bóligi iske qosylýda, ınfraqurylym da damýda. Oblysty toqyma klasteriniń bir ortalyǵy retinde kóremiz. Munda aýyl sharýashylyǵyn, tamaq ónerkásibin, mashına jasaý ónerkásibin damytý úshin zor áleýet bar. Prezıdent atap ótkendeı, Ońtústik Qazaqstan oblysy shıkizat sektoryna táýeldi bolýdan qaldy», dep atap ótti Áset Isekeshev. Qoryta aıtsaq, Ońtústik Qazaqstan oblysy Memleket basshysynyń ındýstrııalandyrý jáne «Nurly Jol» baǵdarlamalaryn júzege asyrýda keýde qatarda keledi. Baqtııar TAIJAN, «Egemen Qazaqstan» Ońtústik Qazaqstan oblysy