Ýkraına birinshi bolyp qoshtasty

*Doda Fýtboldan Fransııada ótip jatqan Eýropa chempıonatynyń toptyq kezeńinde oınaıtyn áli bir oıyny bar ekenine qaramastan, Ýkraına quramasynyń býdan arǵy jarys jolyn jalǵastyra almaıtyny belgili boldy. Buǵan burnaǵy kúni Ýkraınanyń Soltústik Irlandııadan 0:2 esebimen utylýynan bólek, Germanııa men Polshanyń upaı bóliskenderi de áser etti. Osy kúni Anglııa men Ýels arasynda ótken úshinshi oıynda aǵylshyndar sońǵy mınýttarda jeńis dobyn salyp, óz otandastaryn áýpirimdep áreń utty. Anglııa quramasynyń bas jattyq­tyrýshysy Roı Hodjson Ýels komandasymen oıynǵa týrnırdi ashqan reseıliktermen kezdesýdegi quramyn eshbir ózgertpeı shyǵardy. Mundaǵy bolǵan jalǵyz ózgeris: matchtyń basynan buryshtamany ótken jolǵydaı Harrı Keın emes, Ýeın Rýnı bere bastady. Biraq Albıon «arys­tandary» esepti standartty jaǵdaıdan emes, alańdaǵy oıynnyń aýany barysynan ashýǵa tıisti boldy. Osyndaı taktıka ustanǵan komanda bastapqy kezderden. Adam Lallananyń sol qanattaǵy Rahım Sterılıngke zymyratyp dop jiberýi arqyly alǵa qaraı jappaı lap qoıdy. Sol pármenderimen olar qarsy qaqpa aldyna tez-aq jetip bardy. Biraq Rahım­niń birneshe metr jerden urǵan doby qaqpanyń mańdaıshasynan joǵary ketti. Bir baıqalǵany, vallıılik­ter aǵylshyn­dardyń bulaısha ózderin birden qyspaqqa al­ǵandaryna onshalyqty qaı­myǵa qoıǵan joq. Olar 26-mı­nýtta óz qaqpalaryna dop kirip kete jazdaǵanda da qatty abyrjymady. Bir kezde soǵan deıin kóleńkede qal­ǵandaı bolyp júrgen Garet Beıl dúr silkindi. Sol-aq eken kóp uzamaı aǵylshyndardyń kóbesi sógilip júre berdi. 42-mınýtta qaqpa alańy syrtynan belgilengen aıyp dobyn Garet kenet Ronaldýdyń stılindegideı júgirispen kelip, qatty soǵyp jiberdi. Shyńyldaı ushqan dop kúni boıy múlgip turǵan Djo Harttyń sol jaq qolyn janaı ótip, torǵa baryp top ete qaldy. Osydan keıin janushyrǵan «arys­­tandar» tek 56-mınýtta ǵana esepti teńestire aldy. Oıyn budan ári de osy yrǵaqpen ótip jatty. Negizinen aǵylshyndar shabýyl jasap, vallıılikter qarsy joryq uıymdastyryp, jankúıerlerdi eliktirdi de otyrdy. Qorǵanysta óte myǵym bolǵan Ýels matchty osylaı teń aıaqtaıtyndaı bolyp kórinip turǵan. Tek sońǵy mınýttarda Danıel Starrıdjdiń jeke belsendiliginiń arqasynda ǵana aǵylshyndar kútpegen jerden alǵa shyǵyp ketti – 2:1! Mamandar Germanııa men Polsha kezdesýi aıaqtalǵan boıda bul eki jasaq teń oınaý arqyly Ýkraınany týrnırden yǵystyryp shyǵaryp jiberdi degen tujyrym aıtty. Shynynda da atalǵan quramalardyń 0:0 esebimen teń túsýleri sońǵy oıynda ýkraındardy Polshany qandaı eseppen jeńse de, alǵa shyǵa almaıtyndaı etip ketti. Sebebi, bul eki komandada qazirdiń ózinde tórt-tórtten upaı bar. Al osy kúni Ýkraınany 2:0 etip jeńgen Soltústik Ir­landııanyń qorjynynda 3 upaı tur. Demek, kelesi oıynda bular nemisterden jeńilip, ýkraındar 3 upaı alyp, onymen teńesken kúnde de ekeýiniń ózara kezdesýleriniń nátıjesi boıynsha onyń aldyna túse almaıdy. Al Germanııa men Pol­sha arasyndaǵy oıynda qar­sy­lastardyń gol soǵatyn múm­kindikteri onshalyqty kóp bol­ǵan joq. Birinshi týrda 3 upaıdan alyp qoıǵan eki komanda bul matchta óte saqtyq kórsetti. Olar­dy bul joly teń oıyn ábden qanaǵattandyrar edi. Sol arqyly da kelesi kezeńge shyǵýǵa bolatynyn olar jaqsy bildi, Ýkraına – Soltústik Irlandııa básekesine kelsek, bulardyń aldyńǵysy Germanııamen ótken birinshi oıynǵa qaraǵanda, biraz enjar kórindi. Biraq ırlandyqtardyń da olardan asyp bara jatqany shamaly edi. Olar tek bolǵan múmkindikterdi óte jaqsy paıdalana bildi. Bet qattalyp jatqanda: Keshe túnde Italııa – Shvesııa, Chehııa – Horvatııa, Ispanııa – Túrkııa quramalary arasynda kezdesýler ótti. Shvesııadan 1:0 esebimen basym túsken Italııa komandasy eki týrdan keıin 6 upaı jınap, jarystyń 1/8 fınalyna joldama alsa, Horvatııa men Chehııa fýtbolshylary ózara jeńimpazdy anyqtaı almady, esep – 2:2. Al ıspandyqtar túrik áriptesterine esh múmkindik bermeı, 3:0 esebimen oısyrata jeńiske jetti. Osylaısha, Pıreneı túbeginiń aıaqdop sheberleri de týrnırdiń kelesi kezeńine qadam basty. Serik PIRNAZAR, «Egemen Qazaqstan»