Arman qýyp kelgen qyz

Almatyda dzıýdodan ótken álem Gran-prı jarysynyń alǵashqy kúni Qazaqstan sportshylarynyń qorjynyn 1 altyn, 2 kúmis jáne 1 qola medalmen toltyryp tastady. Tatamıde jasyndaı jarqyldaǵan, únemi shabýyl ótinde bolatyn Galbadrah Otgonseseg aqtyq aıqasta Ońtús­tik Koreıanyń úki­le­gen úmiti Vo Djeng Kıongti jeńdi. Galbadrah bıylǵy qatysqan al­ty halyqaralyq týrnırdiń birde-birinde júldesiz qalǵan joq. Gran-prı básekesinde osymen tórtinshi ret jeńimpaz boldy. Almatyda ótken jarysqa Qa­zaqstan dzıýdo quramasynyń bas bapkeri Ermek Iman­baev Olımpıada joldamasyn alyp qoıǵan Eldos Smetov pen Maksım Rakovty salǵan joq. Biraq Rıo-de-Janeıro Olımpıadasynda qarsylastaryn shaq keltirmeıdi dep júrgen Dastan Yqybaev, Ázız Qalqamanuly jáne Erjan Shynkeev júldesiz qaldy. Qyzdar quramasyndaǵy eń tájirıbelisi Gúl­jan Yqsanova Olımpıada jol­damasyna qol sozym qalǵanda súrindi. Bul jaǵdaı, árıne, áıel­der qura­ma­synyń bas bapkeri Jáken Salamatovqa aýyr tıdi. – Biz bul jarystan úlken úmit kútip edik, – dedi ol. – Tájirıbeli Gúljannan bólek, Tashkentte ót­ken Azııa chempıonatynda altynnan olja salyp, Halyqaralyq dzıýdo federasııasy tarapynan Olımpıada kvotasyna ıe bolǵan Marıan Ordabaeva buǵan deıin iri jarystarda jeńiske jetpegen Venesýela dzıýdoshysynan jeńilip qaldy. Al Otgonseseg Galbadrah Gran-prı básekelerinde qarsylastaryn qoǵadaı japyrdy. Rıo-de-Janeıroda ol tamasha óner kórsetedi dep oılaımyn. Galbadrah qazir álemdik reıtıngte úshinshi orynǵa shyqty. Halyqaralyq jarystarda bas­ty qarsylastaryn túgelge jýyq utty. Árıne, aldyn ala bárin kesip-piship aıtý qıyn, biraq, men Otgonsesegke senemin. Burynǵy Mońǵolııa qurama­synyń múshesi, búginde Qazaqstan baıraǵy astynda jeńis toıyn toılap júrgen Galbadrahqa senip otyrǵandar kóp.  Ońtústik Qazaqstan oblystyq sport jáne dene tárbıesi basqarmasynyń basshysy Álibek Nurtaev múm­kindiginshe Galbadrahtyń qatysqan týrnırlerine bardy. – 2015 jyly Qazaqstan dzıýdo federasııasy men Mońǵolııa dzıýdo federasııasy birlesken oqý-jattyǵý ótkizgen kezde balýandar almasý jóninde de memorandým túzilgen bolatyn, – deıdi ol. – Otgonseseg 48 kılo salmaqta tek Mońǵolııa quramasynyń nómiri birinshi dzıýdoshysy ǵana emes, álemdik reıtıngte kósh bastap turǵan Ýranseseg Mýnhbattyń kóleńkesinde qalyp, Olımpıadaǵa barýdan úmitin úzgen. Ekijaqty kelisimnen keıin Otgonseseg jeke jattyqtyrýshysy ekeýi Qazaqstan quramasyna aýysýǵa nıet bildirdi. О́z elinde múmkindigi joq myqty sportshylardy ózge eldiń alýy barlyq memleketterge tán jaǵdaı. Jeke bapkeriniń eńbekqorlyǵy, talapshyldyǵy, óz jumysyna sheksiz berilgendigi meni qatty tańǵaldyrdy. Ol kúndelik júrgizip, Otgonsesegtiń ár saǵatyn esepke alady. Jattyǵýdaǵy júk­te­melerin búge-shigesine deıin jazyp, qorytyndysyn shyǵarady. О́z jerinde Mýnhbattyń kóleń­kesinde qalǵandyqtan, izdegenin Qazaqstannan tapqan Galbadrahtyń burynǵy jeńisteri týraly aıtar bolsaq, ol Álem kýbogynyń 2011 jylǵy qola, 2012 jylǵy kúmis júldegeri. «Úlken dýlyǵa» týrnıriniń eki márte kúmis medalin enshilegen. 2013 jyly Eýropa Kýbogynyń kúmis júldesin alǵan. 2012-2014 jyldar aralyǵynda Gran-prı básekesinde bes ret «qolaǵa» qol jetkizgen. Otgonseseg 2014 jyly Astanada ótken jarys­ta bas júldeni jeńip aldy. Fransııadaǵy «Úlken dýly­ǵa» halyq­aralyq týrnırinde Ot­gonseseg barlyq esesin bir-aq qaıtardy. Ol  aqtyq synǵa deıin eshkimdi bet qaratpaǵan. Al fınalda ózin tasada ustap kelgen jerlesi Ýranseseg Mýnbahpen beldesýge shyqty. Keshegi syralǵy qarsylastar baryn salǵan. Ekeýin de namys oty jandyryp barady. Ne bel, ne belbeý ketetin aıqas. Sál damyldaý, bir sát sheginýdi bilmeıtin bizdiń qyz alymdy boldy. Tóreshi Galbadrahtyń qolyn kótergende, Mońǵolııa quramasy dzıýdoshy qyzdarynyń biri eńirep jylap jiberdi. Al saf altyndy óz qoldarynan uzatqan bapkerlerdiń tilderin qyrshyp alǵany anyq. Galbadrahtyń da kózinen laǵyl jas úzilip, aıdaı betinen tómen syrǵanaǵan. Oıy san taraý ǵoı. Qazaqstan quramasyna ótpegende, armandaı bolyp alystan qol bulǵaǵan Rıo-de-Janeıroǵa barar ma edi, barmas pa edi?!  Baqtııar TAIJAN, «Egemen Qazaqstan» Shymkent