Meıirimdi medbıke

Syrqattanǵanda qa­sy­ńyzdan tabylatyn, qy­sylǵanda qol ushyn beretin medısına qyz­met­kerleriniń biri – medbıke. Ádette, naý­qastanyp qalǵan jan­darǵa aıaly alaqanymen, jyly qabaǵymen qýanysh syılaıtyn medbıkeler jó­ninde kóp aıtyla bermeıdi. Solardyń biri – О́skemen qalasyndaǵy me­dısınalyq jedel járdem stansasynyń bas medbıkesi Galına Jalbakova. 1980 jyly О́skemen qalasyndaǵy me­dısınalyq ýchılısheni feldsher maman­dyǵy boıynsha támamdaǵan jalyndy jas alǵashqy eńbek jolyn jedel járdem kóliginde qyzmet etýden bastaǵan eken. Kóp uzamaı turmys quryp, dekrettik demalys­tan oralǵan ol qaladaǵy medısınalyq mekemelerde kishi medbıke bolyp jumys isteı bastady. Jaýapkershiligi mol, alǵyr, kez kelgen naýqastyń pás kóńilin shaıdaı ashatyn medbıkeniń máttaqamdyǵy kózge shalynbaı qalǵan joq. 1997 jyly Glýbokoe aýdandyq aýrýhanasynyń bas medbıkesi bolyp taǵaıyndaldy. Al 2012 jyldan bastap oblys ortalyǵyndaǵy medısınalyq jedel járdem stansasynda eń­bek etip kele jatqan Galına Kaderovnanyń bas medbıkelik, ıaǵnı uıymdastyrýshylyq ótili 20 jyldy qurasa, jalpy medısınalyq eńbek jolyna 36 jyl tolypty. Osy jyldardyń ishinde qan­shama adamnyń taǵdyry, densaýlyǵy, oǵan arasha túsken syn sátter men mańdaı ter, alǵys jatyr! Áriptesteri Galınany bilikti maman retinde joǵary baǵalaıdy. Qoǵamdyq jumystarǵa belsene atsalysyp turatyny taǵy bar. Aıtalyq, 2000-2004 jyldary Glýbokoe aýdandyq máslıhatynyń depýtaty atandy. Aýdan deńgeıinde jergilikti halyqtyń densaýlyǵyn nyǵaıtý máselelerin sheshýge atsalysty. Sonymen birge, sońǵy úsh jyl kóleminde Shyǵys Qazaqstan oblystyq densaýlyq saqtaý basqarmasynda orta medısınalyq qyzmetkerlermen jumys boıynsha shtattan tys bas maman bolyp eńbek etip keledi. Medbıkelik qyzmettegi menedjerlik boıynsha baı tájirıbe jınaqtaǵan keıipkerimizdiń ujymda, árip­testeri arasynda ózindik orny bar. О́zin-ózi únemi jetildirip júretin Galına Kaderovna 2014 jyly «Densaýlyq saqtaý salasyndaǵy biliktiligin rastaý men kásibı daıarlyǵyn baǵalaý boıynsha sımýlıasııalyq ortalyq mamany» taqyrybynda oqýdan ótti. Odan keıingi eki jylda óńirdegi medbıkeler­diń biliktiligin kóterýge ózi de úlken úles qosa bastady. 2004 jyly S.Amanjolov atyn­daǵy Shyǵys Qazaqstan memlekettik ýnıversıtetinde «Tájirıbelik psıhologııa» mamandyǵy bo­ıynsha joǵary bilim alǵan bilikti maman medbıkelik iste adam janyn túsine bilýdiń erekshe mańyzdy ekenin aıtady. – Qazir kóptegen jastar medısınalyq orta oqý oryndaryn bitirip, qatarymyzǵa qosylyp jatyr. Jas býynmen baılanys jyldan jylǵa nyǵaıyp keledi. О́skemen qalasyndaǵy medısına kolledjimen tyǵyz qarym-qatynastamyz. Olar medbıke isi boıynsha Astana, Almaty qalalarynda biliktilikterin tekseredi. Byltyr Semeı qalasyndaǵy óńirlik onkologııa ortalyǵy, О́skemen qalasyndaǵy №1 qalalyq aýrýhana bazasynda ǵylymı konferensııalar ótkizdik. Jas mamandar arasynda túrli baıqaýlar uıymdastyramyz. Jalpy, qazirgi kezde medbıke dáriger taǵaıyndaǵan emdi oryndap qana qoımaıdy. Joǵary medbıke isi boıynsha biliktilik alǵan maman dárigerdiń negizgi kómekshisi bolyp tabylady. «Jasyna qaraı izet, eńbegine qaraı qurmet» degen sóz bar. Galına Jalbakovany 2014 jyly Qazaqstan medısına qyzmetkerleriniń ulttyq qaýymdastyǵy «Meıirim» medalimen marapattady. Densaýlyq saqtaý mınıstrligi jáne salalyq basqarma men mekemelerden alǵan marapattary da jeterlik. Eń bastysy, ol eki bala mápelep ósir­gen ana. Úlken uly Rınat qazir er jetip, qoǵam­nan óz ornyn tapsa, qyzy Krıstına anasynyń jolyn jalǵap, Semeıdiń medısınalyq akademııasynyń 4-kýrsyn aıaqtady. Medı­sınaǵa bet burýyna áke yq­palynyń bolǵanyna ókinbeıtinin aıtqan Galına óz kezeginde qyzynyń da oqýda ozat, ortasynda belsendi jas ekenin maqtanysh tutatynyn jetkizdi. Sabaqtastyq degen de osy emes pe! Dýman ANASh, «Egemen Qazaqstan» О́SKEMEN