Mýzeı – eksponattar qoımasy emes, ulttyq mura

Qazaqstanǵa eń alǵash kelgen sanaly sheteldikter sapar barysyn múmkindiginshe mýzeıden bas­taıdy. Qazaq degen qandaı halyq, shyǵý tegi, ata-babalary, mádenıeti, salt-dástúri, rýhanı muralarynyń bastaýlary... Qazaqstan ekonomıkasyna ınvestısııa salǵysy kelgen sheteldik alpaýytqa osynyń bári kerek. Sondyqtan, bireýler oılaıtyndaı, mýzeı – eksponattar saqtaıtyn qoıma emes, eldiń bolashaǵyn kór­kem etetin ınvestısııalyq múmkin­dikterge de qyzmet jasaıdy. Qazaqstan Respýblıkasy Ult­tyq mýzeıiniń Shymkenttegi Sh.Qal­daıaqov atyndaǵy oblystyq fılarmonııasynda ótken «Ulttyq mýzeıge syı tartý» respýblıkalyq aksııasynda osyndaı da oılar aıtyldy. «Ulttyq mýzeıge syı tartý» aksııasyna Shámshi Qaldaıaqov, Faı­zýlla Úrmizov, General Asqa­rov, Sabyr Raqymov, Ásilhan Os­panuly, Kerimbek Syzdyqov, Bekzat Sattarhanov syndy ulty­myzdyń birtýar perzentteriniń urpaqtary men týǵan-týystary qaty­syp, olar qoldanǵan zattar men buıym­dardy tabys etti. Sonymen qatar, oblystyń Nurlan Shılibaev, Bolatbek Beıs­bekov, Kúlásh Aıdarbekova, Aınabek Ospanov, Batýhan Baı­menov, Abdýahat Muratbaev, Sul­tan Ilıaev, Araılym Beıisbek, Mádı­na Ahmetova sekildi talantty óner sýretshi-músinshileriniń shyǵar­mashylyq jumystary da Ulttyq mýzeıge tabystaldy. Elbasynyń tikeleı uıytqy bolýymen ashylǵan Ulttyq mýzeı búginde Ermıtaj, Metropolıten sııaqty álemdik qundylyqtarmen úzeńgi qaǵysýǵa jarap qaldy. Jıynda sóz alǵan Ulttyq mýzeı dırektory Darhan Myńbaı qazaq tarıhyna qatysy bar ár jádigerdiń orny bólek ekendigine toqtaldy. Máselen, uly kompozıtor Shámshi Qaldaıaqovtyń pıanınosy áldebir saıajaıda jatqanyn estip, mýzeıge aldyrtqan. Búginde restavrasııadan ótip jatqan sol pıanınoda bálkim, Shámshi aǵamyz búkil qazaq rýhyn kótergen «Meniń Qazaqstanym» ánura­nyn alǵash oryndaýy da múmkin ǵoı. – Ońtústik – qut qonǵan jer, tarıhı tabıǵı bolmysy ózine jarasatyn el, – dep sózin sabaqtaǵan Darhan Qamzabekuly ulttyq mura­larymyzdyń qaınar kózi negizinen osy qunarly topyraqta ekendigine arnaıy toqtaldy. Osy Ońtústiktiń ǵajaıyp ulda­rynyń biri, memleket qaıratkeri О́zbekáli Jánibekovtiń bastamasymen dúnıege kelgen Qazaq ult aspaptary mýzeıiniń álemde bási bólektigine toqtaldy. Tarıhı jádigerler ol tek bir otbasynyń kóz qýanyshy bolyp qana qoımaı, tutas el tarıhyna, bolashaǵyna qyzmet etý kerek. «Ulttyq mýzeıge syı tartý» aksııasynyń mánin mysaldarmen dáıektegen Darhan Myńbaıdyń sózin sahnaǵa shyqqan zııalylar da qoshtady. Qasıetti Otyrar ólkesinde kózi tirisinde-aq «mýzeı adam» atanǵan Asantaı Álimov degen aqsaqal ómir súrgen. Sol aǵamyzdyń sońyna ergen inisi, bar ǵumyryn Otyrar jádigerlerin jınaýǵa jumsaǵan Abdýlla Jumashev aǵamyz Baýyr­jan Momyshulynyń saǵatyn, dosy Islamqulǵa jazǵan hattary men sırek qoljazbalaryn Ulttyq mýzeıge syıǵa tartty. Sapar barysynda Qazaqstan Respýblıkasynyń Ulttyq mýzeıi Ońtústik jerinen 300-ge tarta qundy jádiger alyp qaıtty. Baqtııar TAIJAN, «Egemen Qazaqstan» Ońtústik Qazaqstan oblysy