Keshe Baılanys jáne aqparat qyzmetkerleri kúni qarsańynda «Nur Otan» partııasynyń Ortalyq apparatynda jýrnalıster arasyndaǵy dástúrli «Nur Suńqar» respýblıkalyq baıqaýynyń jeńimpazdaryn marapattaý saltanaty bolyp ótti.
Parlament Májilisiniń depýtaty Qýanysh Sultanov tóraǵalyq etken arnaıy qurylǵan komıssııa bir aı kóleminde baıqaýǵa túrli janrdaǵy, atap aıtqanda, ocherk, suhbat, maqala, televızııalyq jáne radıobaǵdarlamalar, jýrnalıstik zertteý, sondaı-aq, jarııalanymdar men baǵdarlamalar sıkly boıynsha materıaldar qabyldady. Komıssııa quramyna elimizdiń buqaralyq aqparat quraldarynyń eń bedeldi ókilderi kirgen.
Baıqaýǵa qatysý úshin jýrnalısterdiń Elbasy, «Nur Otan» partııasynyń Tóraǵasy N.Á.Nazarbaevtyń aldyǵa qoıǵan mindetteri men tapsyrmalarynyń júzege asý barysyna, «Qazaqstan-2050» Strategııasynyń basymdyqtaryna, «Nur Otan» partııasy Doktrınasynyń qaǵıdalaryna jáne partııa bastamalaryna arnalǵan jumystary qabyldandy.
Sóıtip, «Nur Suńqar» baıqaýyna respýblıkalyq jáne aımaqtyq buqaralyq aqparat quraldarynan 230-dan astam ótinish kelip tústi. Olardyń ishinen 83 jumys irikteýden ótti.
Qorytyndy kezeń boıynsha, «Álem. HHI ǵasyr» manıfesin júzege asyrýǵa qosqan úlesi úshin» atalymy boıynsha syılyqqa «Kazahstanskaıa pravda» respýblıkalyq gazeti» AQ basqarma tóraǵasynyń orynbasary Tatıana Kostına ıe boldy.
«Nur Otan» partııasynyń jumysy jónindegi eń úzdik materıalǵa arnalǵan syılyq «24.kz» telearnasyndaǵy «Suhbat» baǵdarlamasynyń avtory jáne júrgizýshisi Erlan Igisinovke berildi.
Úzdik televızııalyq jýrnalısterge beriletin «Erekshe pikir» atalymyna birden eki úmitker laıyq dep tanyldy. Olar – «Habar» agenttigi saraptamalyq baǵdarlamalar bóliminiń tilshisi Aıgúl Ádilova men «Qazaqstan» telearnasynyń arnaýly tilshisi Álimjan Isabaı.
«Sóz sheberi» atalymy boıynsha úzdik jýrnalıst retinde «Aıqyn» gazetiniń redaktory Beısen Tájibaev jeńimpaz atandy. «Qoǵam úni» atalymynda úzdik radıojýrnalıst ataǵy «Orda FM» radıosynyń dıktory Erlan Sısenovke berildi.
«Aımaq aınasy» atalymy boıynsha jeńis «Egemen Qazaqstan» gazetiniń Jambyl oblysyndaǵy menshikti tilshisi Oralhan Dáýitovke buıyrdy. «Shymkent kelbeti», «Ońtústik Qazaqstan», respýblıkalyq «Túrkistan», «Jas Alash» gazetterinde jumys istegen Oralhan Dáýitovtiń jýrnalıstıka salasynda eńbek etip kele jatqanyna jıyrma jyldyń júzi boldy. Osy ýaqyt ishinde qalamy júırik áriptesimiz talaı másele kóterip, tushymdy dúnıelerimen oqyrmandy tánti etti. Birneshe jyldan beri «Egemen Qazaqstan» gazetinde jemisti eńbek etip keledi.
Aqparat agenttiginiń úzdik jýrnalısine beriletin «Medıa-profı» atalymyna NUR.kz saıtynyń tilshisi Iýlııa Abramova laıyq dep tanyldy. «Kózqaras» atalymy boıynsha úzdik blogerler retinde Sholpan Álı men Qanat Áýesbaı jeńiske jetti.
Jeńimpaz júldegerlerge 500 myń men 1 mıllıon teńgeden aqshalaı syılyq tabys etildi. «Nur Suńqar» – partııa men BAQ ókilderi arasyndaǵy áriptestikti jáne yntymaqtastyqty damytýdy kózdeıtin Qazaqstannyń barlyq jýrnalısine arnalǵan dástúrli ashyq baıqaý.
Raýshan TÁÝIRHANQYZY,
Jýrnalıst
