«Eralıev qyzmetinen ketpeı, esepshotqa aqsha túspeıdi»

Korporasııanyń bul sheshimi qanshalyqty zańdy? Alǵash osy jaıtty esti­gende kóz aldyma jas bala­lardyń bir-birimen ren­jisip: «Men saǵan endi oıyn­­shyǵymdy bermeımin» dep burtıyp ketip qalatyn sáti elestegendeı bolǵan. Sóıtsek, bul biz oılaǵandaı balalardyń oıyny emes eken. Áp-ájeptáýir úlken ki­siler bir-birine qatty ók­pelepti. «Agrarlyq nesıe» AQ Jambyl oblysy bo­ıynsha fılıalynyń dırek­tory Nurǵalı Seıit­be­kov bıylǵy jyldyń 6 sáýir­inde «Jýaly» nesıe seriktestigi» JShS-i­ne ar­­naıy hat jazyp, «osy serik­­­testiktiń tór­aǵasy Ba­kı­ran Eralıev qyz­met­i­nen ketpeıinshe, eshqandaı qar­jylandyrý bolmaıdy» dep bar ókpe-renishin úıip-tógipti. Oıpyrmaı, «Jer astynan jik shyqty, eki qulaǵy tik shyqty» degen, bul ne qylǵan tik qulaqty buı­ryq boldy? Bir adamǵa bola búkil aýdannyń qarjysyn toq­tatyp tastaý múmkin be? Onyń ús­­tine bul quda shaqyrýǵa emes, aýyl sharýashylyǵyn qoldaýǵa berilip jatqan qarjy emes pe? Jal­­py «Pálenshe bizge qarasyn kórsetpesin, áıtpese bir tıyn da aqsha bermeımin» dep aıtýdyń ózi qanshalyqty zańǵa syıymdy? Biz bul jóninde aldymen «Jýaly» nesıe seriktestigi» JShS-tiń basqarma tóraǵasy Bakıran Eralıevpen sóı­lestik. – «Jýaly» nesıe seriktestigi 2003 jyly 38 quryltaıshy, 11 169 myń teńge jarǵylyq qormen qu­rylǵan bolatyn, – deıdi Bakıran Qoıshybaıuly. – Osy ýaqyt ishinde 77 sharýa qojalyǵy 268 262 myń teńge nesıemen qamtamasyz etil­di. Alynǵan nesıeniń 177 665 myń teńgesi qaıtaryldy. Qazir ssýdalyq qorjynymyz 90 596 myń teńgeni qurap otyr. Áıteýir óz mindetterimizdi abyroımen at­qaryp kelemiz. Solaı bola tura «Agrarlyq nesıe» AQ Jambyl ob­lysy boıynsha fılıalynyń dırektory Nurǵalı Seıitbekov «depozıt salymyna 5 276 myń teńge salynbaǵan» dep nesıe jelisin qaıta-qaıta jaýyp, onyń mólsherin ulǵaıtýǵa múmkindik bermeı keledi. Osynyń saldarynan qazir 3 sharýa qojalyǵy korporasııa maquldaǵan 16 600 myń teńgeni ala almaı júr. Biz muny Seıitbekov myrzanyń qıturqy áreketi dep bilemiz. Ol «Basqarmany aýystyrmasańdar, nesıe bermeımin» dep, quryltaıshylar arasyna iritki salýda. Seıitbekovtiń ózi alyp kelgen jańa basshyny quryltaıshylar qoldamaı, men óz qyzmetimde qaldym. Endi álgindeı buıryq berip, aldaǵy ýaqytta ta­ǵy jınalys ótkizbek. Biz muny seriktestiktiń ishki isine zańsyz aralasý dep túsinemiz. Aqsha júrgen jer qashanda aıqaı-shý bolatyny belgili. Áıtse de bul jeke bireýdiń qaltasyndaǵy aqsha emes nemese bir adamnyń aıtqanymen taǵaıyndala salatyn qyzmet emes. Quryltaıshylar qoldaǵan basshyny qarjy berý­shiler nege jaqtyrmaı otyr? Biz osy másele boıynsha Nurǵalı Seıitbekovtiń ózimen telefon ar­qyly sóılestik. Sol kisiniń tapsyrmasymen máseleniń anyq-qanyǵyn «Agrarlyq nesıe» AQ Jambyl oblysy boıynsha fı­lıalynyń keńesshi mamany Ah­medııar Aıt­baev túsindirip aıtyp berdi. Keıinirek korporasııa elektrondyq poshtamyzǵa hat ta jazyp jiberipti. – Jambyl oblysynda 11 nesıe seriktestigi jumys isteıdi, – deı­di A.Aıtbaev bul jóninde. – Ár­qaısysynyń óz jospary bar. Bul seriktestikterdi qarjylandyratyn – bizdiń korporasııa. Sondyqtan korporasııa olarǵa senim bildirip, óz sharttary men talaptaryn qoıady. Osy oraıda «Jýaly» nesıe seriktestiginiń jumysyna eshqandaı kóńil tolmaıdy. Aýdanda bas-aıaǵy 5,5 myń sharýa qojalyǵy bar bolsa, osy jyldar ishinde B. Eralıev bar-joǵy 35-aq sharýa qojalyǵyn qatarǵa tartty. Sońǵy 10 jylda jýalylyq sharýalar nebári 200 mln. teńgeden astam ǵana nesıe aldy. Basqa aýdandarda bul somany bir-aq jylda ıgerip tastaıdy. Odan bólek ótken jyly bul seriktestiktiń jumysyn teksergen aýdıtorlar 460 eskertý berdi. Osyǵan baılanysty «Agrarlyq nesıe» AQ korporasııa­sy quryltaıshylar Eralıevti aýystyrmaıynsha qarjylandyrýdy toqtatý týraly sheshim qabyldady. Bul sheshim elimizdiń zańdaryna, AQ-tyń ishki erejelerine esh­qandaı qaıshy kelmeıdi. Bul jerde N.Seıitbekov zańǵa saı áreket jasap otyr. О́ıtkeni, barlyǵyna qoıylar talap bir. Ras, korporasııa basshylyǵy nesıe seriktestigi jetekshileriniń jumystan ketýin tabandy túrde talap ete almaıdy. Biraq, óz kezeginde mundaı ju­­­mysy nashar seriktestikterge qarjy bólýge de táýekel ete almaıdy. Korporasııa «Jýaly» nesıe seriktestigi quryltaıshylarymen jalpy jınalys ótkizip, basshyny aýystyrý jóninde usynys en­gizgen. Biraq quryltaıshylar bul usynysty qabyldamady. Mine, osylaısha eki jaq ta óz ustanymdaryn durys dep otyr. Áıtse de bul baǵytta Jýalyda qı­yn jaǵdaı qalyptasyp otyrǵanyn ja­syrýǵa bolmas. Eki ortada sharýalar shaqasyna qol jetkize almaı, tirligin dóńgeletýge sep bolatyn demeýshini joǵaltaıyn dep turǵan sııaqty. Árıne, «Qyryq kisi bir jaq, qyńyr kisi bir jaq» dep, bul máselede B. Eralıevti kinálaıyn deseń, quryltaıshylardyń qol­daýyn qaıda qoıamyz? Olardyń da bir bilgeni bar ǵoı. Qalaı aıtsaq ta korporasııa basshylyǵy «Eralıev qyzmetinen ketpeıinshe qarjy bermeımiz» dep, qabaǵyn túıip otyra bermeı bul máseleni oń sheshýge umtylyp, til tabýǵa taǵy da talpynys jasaýy kerek sııaqty. О́ıtkeni, joǵarǵy jaqtaǵylardyń «shaıqasynan» sharýa­lar zardap shekpeýi tıis. Oralhan DÁÝIT, «Egemen Qazaqstan» Jambyl oblysy