Aqparat quraldary men baılanys salasynyń úzdikteri marapattaldy

Keshe Baılanys jáne aq­parat qyzmetkerleriniń kúni me­rekesine oraı «Qaz­Medıa orta­lyǵynda» salta­natty is-shara ótti. Onda Aq­parat jáne kom­mýnı­­ka­sııa­lar mınıstri Dáýren Abaev jýrnalıster men baı­la­nys salasynyń qyz­metker­­lerin kásibı mereke­simen qut­tyqtap, olardyń bir to­byn «Úzdik baılanysshy» jáne «Aqparat salasynyń úzdi­gi» tósbelgilerimen mara­pat­tady. Merekede eń aldymen Premer-Mınıstrdiń orynbasary Darıǵa Nazarbaevanyń BAQ ókilderine joldaǵan quttyqtaý haty oqyldy. Onda: «Qurmetti BAQ ókilderi men baı­lanys salasy­nyń qyzmetkerleri, Sizderdi búgingi kásibı tól mere­kelerińizben shyn júrekten qut­tyq­taımyn. Táýel­sizdiktiń 25 jy­lynda elimizdegi aqparat salasy jańa belesterdi baǵyndyryp, jedel habar taratýda úzdik keledi. Qazirgi tehnologııasy damyǵan zamanda qoǵamǵa bilikti mamandar qajet. Kez kelgen jańa­lyqty der ýaqytynda ha­lyq­qa jetkizip, óz aýdıtorııasyna shy­naıy aqparat berý árbir BAQ ujymynyń mindeti. Osy oraıda, men sizderge shyǵarmashylyq ta­bys, otba­sy­laryńyzǵa tek jaq­sy­lyq tileı­min» – degen izgi lebizder bar. Munan soń mınıstr Dáýren Abaev qos salanyń qyzmetkerlerine shy­naıy quttyqtaýyn jetkizdi. – Qurmetti áriptester, qym­batty dostar, barshańyzdy Baı­lanys jáne aqparat qyzmetkerleri kúnimen shyn júrekten quttyq­taımyn. Memleket basshysy aıt­qandaı, HHI ǵasyrda aqparat sala­sy oqıǵalardy taratýshy ǵana emes, tutas álemde onyń qalaı óris­tep otyrǵanyn aıshyqtaıtyn je­tekshi kúshke aınaldy. Álemde buryn-sońdy bolmaǵan úrdister júzege asyp, baılanys pen aqpa­rat qoǵamnyń bar salasyna qalaı yqpal etip jatqanyn kórip júrsizder. Osynaý jahandyq trend aıasynda Qazaqstannyń osy salalary qar­qyn­dy damyp keledi. Aqparat jáne kom­mýnıkasııalar mınıstrligi úshin búgingideı qym-qýyt zamanda óz­derińiz sııaq­ty maıtalman mamandarmen tyǵyz qarym-qaty­nasta birge bolý óte mańyzdy, – dedi mınıstr. Sonymen qatar, ol jýrnalıstıkanyń qazanyn­da qaınap, baılanys salasynyń basy-qasynda júrip úzdik atanǵan bir top qyzmetkerdi marapatta­dy. Olarǵa mınıstrliktiń tósbelgileri men Qurmet gramotasy tabystaldy. Munan keıin saltanatty shara­ǵa arnaıy kelgen Parlament depý­tattary da BAQ ókilderin quttyqtap, aq tilekterin jetkizdi. Al merekelik shara sońy konserttik baǵdarlamaǵa ulasty. Talǵat RAIYMBEK, «Egemen Qazaqstan»