«Ash-Shababtyń» aıaýsyz áreketi
«Ash-Shabab» ıslamıstik toby sodyrlarynyń Somalıdegi áskerı bazaǵa jasaǵan shabýyly saldarynan kem degende 10 áskerı qyzmetshi qaza tapty, dep habarlaıdy Reıter agenttigi áskerılerge silteme jasaı otyryp. Agenttiktiń málimetinshe oqıǵa dúısenbi kúni el astanasy Mogadıshonyń ońtústik-batysynda oryn alǵan.
Mına qoıylǵan avtomobıl bazanyń qaqpasyna baryp soǵylyp, odan keıin sodyrlar ishke basyp kirgen. 10 soldattyń qaza tabýyna da osy shabýyl sebep bolǵan kórinedi. Atalmysh top qandy shabýyl úshin jaýapkershilikti óz moıyndaryna alyp otyr. Olardyń aıtýlaryna qaraǵanda, bazaǵa shabýyl kezinde 30 soldat qaza tapqan. Aıta ketý kerek, «Ash-Shabab» eldiń ortalyq úkimetine qarsy qarýly kúres júrgizip, BUU-nyń gýmanıtarlyq qyzmetine kedergi keltirip keledi.
Japonııa konstıtýsııany qaıta qaramaq
Japonııa úkimeti el parlamentiniń tómengi palatasyndaǵy konstıtýsııalyq komıssııada eldiń beıbit konstıtýsııasyn qaıta qaraý máselesin zerttemek nıette. Bul týraly dúısenbi kúni baspasóz máslıhatynda premer-mınıstr Sındzo Abe habarlaǵan.
Eń aldymen, muny konstıtýsııalyq komıssııada salmaqty túrde talqylap alý qajet. Kıodo agenttigi premerdiń osylaı degen sózin keltirip otyr. Osyǵan baılanysty Abe negizgi zańdy qaıta qaraý múmkindigine qatysty oppozısııanyń teris reaksııasyn syndarly qadamǵa jatpaıdy dep atady. Osynyń aldynda elde parlamenttiń joǵarǵy palatasyna ótken saılaýda Abe basqaratyn lıberaldy-demokratııalyq partııa men «Komeıto» partııasy orynnyń úshten birine ıe bolǵan edi. Al ol negizgi zańdy ózgertýge múmkindik beredi.
Terrorshynyń týystary elden qýyldy
Kýveıttiń qaýipsizdik qyzmeti osydan bir apta buryn Djıdda qalasyndaǵy AQSh-tyń bas konsýldyǵyna qarsy ornalasqan aýrýhana avtoturaǵynda jarylys jasaǵan jankeshti terrorshymen týystyq baılanysy bar degen úsh pákistandyqty Emırattan shyǵaryp jiberdi, dep habarlady dúısenbi kúni osy eldiń «Al-Kabas» gazeti.
Kýveıtte Islam memleketi dep atalatyn uıymmen baılanysy bar degen kúdikpen 6 adam qamaýǵa alyndy. Aıta ketý kerek, Pákistannan shyqqan jankeshti AQSh-tyń Djıddadaǵy bas konsýldyǵyna jaqyn jerde túngilik ózine polıseıler jaqyndap kele jatqan shaqta ózin-ózi jaryp jibergen bolatyn. Sonyń saldarynan qaýipsizdik qyzmetiniń 2 qyzmetkeri zardap shekken edi. Saýd Arabııasynyń ár jerlerinde oryn alǵan birneshe teraktilerden keıin koroldik bıligi 19 adamdy qamaýǵa alǵan bolatyn, olardyń 12-si pákistandyqtar bolyp shyqty.
Jasóspirim úsh polıseıdi atyp óltirdi
Túrkııanyń ońtústik-shyǵysynda ornalasqan Shanlyýrfa qalasyndaǵy avtobýs aıaldamasynda bir jasóspirim oq atyp, sonyń saldarynan úsh polıseı qaza taýyp, taǵy úsheýi dene jaraqattaryn alǵan. Bul týraly Anadoly agenttigine silteme jasaı otyryp, Reıter agenttigi habarlady.
Jasóspirim polısııa qyzmetkerleri avtobýs aıaldamasynda turǵan adamdardan jeke kýálikterin suraǵan kezde oq atqan. Osydan soń ol oqıǵa ornynan qashyp ketip, ózge polıseılerge qarsy taǵy da oq jaýdyrǵan. Úsh polısııa qyzmetkeriniń aýrýhanada qaıtys bolǵany málim bolyp otyr. Agenttiktiń málimetterine qaraǵanda, oq atýshynyń kózi joıylǵan. Qala gýbernatory bul oqıǵanyń terrorızmge esh qatysy joq ekenin, oq atqan 17 jasar jigittiń aqyl-esinde aýytqýshylyq bolǵanyn aıtqan.
Narazylyq bildirýshiler sany azaımaı otyr
Lýızıana shtatynyń Baton-Rýj qalasyndaǵy afroamerıkalyqtyń ólimine baılanysty narazylyqtar barysynda ustalǵandar sany 160 adamǵa deıin jetti, dep habarlady Assoshıeıted Press agenttigi. Buǵan deıin 101 adam ustaldy dep habarlanǵan bolatyn.
Onyń syrtynda ustalǵandardyń arasynda Black Lives Matter (Qaralar ómiriniń máni bar) qozǵalysynyń belgili belsendisi, qara násildi halyqqa qatysty kúsh kórsetýge qarsy áreket etip júrgen De Reı Makessonnyń bolǵany da anyqtalyp otyr. Agenttiktiń málimetteri boıynsha, kezekti narazylyq barysynda polısııa basqarmasyna qarsy jatqan kóshelerge júzdegen adam jınalǵan. Ereýildi plastmassa qalqandary men qarý-jaraqtary bar ondaǵan polısııa qyzmetkerleri baqylap turǵan. Aıta ketý kerek, narazylyq aksııasy AQSh-tyń kóptegen qalalarynda ótken beısenbi kúni bastalǵan bolatyn.
Qytaılyq ushaq burshaq astynda qaldy
China Southern Airlines áýe kompanııasynyń áýe laıneri QHR-daǵy ushý barysynda kúshti burshaqtyń astynda qalyp, sonyń saldarynan ushaqtyń tumsyq jaǵy aıtarlyqtaı zaqymdanǵan. Bul týraly Qytaıdyń ortalyq teledıdary óziniń áleýmettik jelidegi resmı akkaýntynda habarlaǵan.
Oqıǵa senbi kúni keshkilik oryn alǵan. CZ 3483reısi Gýanchjoýdan Chendýǵa bet alǵan shaqta úlken daýyldyń astynda qalǵan. Telearnanyń málimetterine qaraǵanda, ushaq oryn alǵan oqıǵadan keıin Chendý qalasyna sátti qonǵan. Jolaýshylar men ekıpaj músheleriniń eshqaısysy zardap shekpegen. Ushaqtyń tumsyq jaǵy men aldyńǵy shynysynyń zaqymdanǵany belgili bolyp otyr. Olarda kóptegen burshaq izderi qalǵan kórinedi.
Oq nóseri astyndaǵy Iemen
Iemenniń batysyndaǵy shekaraǵa jaqyn ornalasqan Hadja provınsııasyndaǵy Mıdı qalasy aıaýsyz zymyrandyq jáne artıllerııalyq atqylaýdyń astynda qaldy, dep habarlady dúısenbi kúni lıvandyq «Al-Maıadın» telearnasynyń tilshisi.
Oryn alǵan qurbandyqtar týraly ázirge eshqandaı aqparat joq. Eldi mekenge oqtyń Saýd Arabııasy jaǵynan atylǵandyǵy anyqtalýda. Iemende 2014 jyldan beri burynǵy prezıdent pen qazirgi prezıdentti jaqtaýshylar arasynda qarýly qaqtyǵystar júrip jatqany belgili. Bılikke Saýd Arabııasy bastaǵan arab elderiniń koalısııasy áskerı qoldaý kórsetýde.
