Shilde aıynyń sońynda, ıaǵnı 30-y kúni elordalyqtar men qala qonaqtary pıanınoshylar quramyndaǵy halyqaralyq baıqaýlardyń jeńimpazdary Aleksandra Egorova men Aıa Bolatovadan quralǵan «Lotus Bleu» fortepıanolyq dýetiniń ózgeshe ónerin tamashalaı alady. Konsert «Astana Opera» teatrynyń Kameralyq zaly sahnasynda «Eselengen shabyt» degen atpen ótpek.
«Lotus Bleu» dýetiniń oryndaýynda HIH-HH ǵasyrlardaǵy shetel kompozıtorlarynyń, sondaı-aq amerıkalyq jas kompozıtor, pıanıst, beıneprodıýser ári jazýshy Greg Andersonnyń shyǵarmalary kópshilik nazaryna usynylady. О́nerpazdardyń aıtýynsha, konsert aıasynda buryn oryndalmaǵan shyǵarmalar premeralaryna erekshe kóńil aýdarylmaq. Iаǵnı, jas ujymnyń bul konserti «tańǵaldyrý» jáne «jańalyq ashý» tujyrymdamasy men ustanymdaryna sáıkes kelmekshi. Belgili nemis kompozıtory, organshy Maks Regerdiń ózgeshe oryndaýdy qajet etetin alty pesasy da Qazaqstanda alǵash ret qoıylady. Sondaı-aq, qazaqstandyqtar úshin Greg Andersonnyń óńdeýindegi eki roıalǵa arnalǵan «Karmen-fantazııasy» da tyń jańalyq bolmaq.
Atalǵan aspaptyń sheber oryndaýshylary taıaýda ǵana Italııadan jeńispen oraldy. Onda «Lotus Bleu» dýeti halyqaralyq pıanınoshylar baıqaýynda (Iskıa) júldeli ekinshi oryndy ıelengen eken. Jalpy, «Lotus Bleu» dýeti jaıly halyqaralyq deńgeıde endi ǵana aıtyla bastaǵanymen, onyń solısteri jeke-dara áldeqashan tanylǵan, sondyqtan da tanymal bolyp úlgergen ónerpazdar. Mundaı shaǵyn quramda shyǵarmashylyq ujym qurý ıdeıasynyń avtory Aleksandra Egorova – túrli dárejedegi halyqaralyq baıqaýlardyń jeńimpazy retinde kóptegen marapattyń ıegeri.
Ol óziniń pikirin bylaısha túıindedi: «Ár pıanınoshy ózderiniń ishki dúnıesinde – solıst, al solısterdiń bir-birimen úılese ketýi óte qıyn. Eýropada pıanıster tek ózderiniń jeke karerasymen aınalysatyn jáne dýetterde ǵana oınaıtyn pıanınoshylar bolyp bólinedi. Dýet paıda bolǵan saıyn, mýzykanttar da ortaq oılarymen bólisip, bir-birin túsine bastaıdy, birlesip jaqsy óner kórsetedi. Sol sebepti, shetelde fortepıanolyq dýetter sátti qurylsa, onda jeke oryndaýshylyqqa bólinbeı, sol qurammen óner kórsete beredi. Fortepıanolyq dýet qurý ıdeıasy men úshin aıtarlyqtaı jańalyq bolyp tur. Qazirgi zamanǵa saı ózgerip kele jatqan jáne konservatıvtik pikirdi ǵana ustanbaıtyn mýzykant retinde maǵan dál ózimdeı pıanıst-solıstpen bir dýette oınaı alatyndyǵymdy tekserip ári synap kórý óte qyzyqty. Aıa týraly aıtar bolsam, biz ekeýmiz burynnan tanyspyz, sebebi magıstratýrada birge oqydyq. Fortepıanodan dýet qurý týraly oıymdy aıtqanymda, ol meni birden qoldaı ketti».
Aıa Bolatovanyń aıtýynsha, alǵashynda dýet eki roıalda oınaǵan, al mundaı óner kórsetýge mashyqtanýdyń ózi erekshe tebirenis syılaıtyn kórinedi. «Árkim óz roıalyna otyrǵannan keıin, aspapty tolyq meńgerýdiń artyqshylyǵy mol. Keıinirek biz ári qaraı da óz-ózimizdi jetildirýdi oılap, shyǵarmany birlese, tórt qolmen oınap kórýge bekindik. Sol kezde jaǵdaı ózgerdi. Nátıjesinde, túrli erekshelik baıqala bastady. Birtindep shyǵarmany qalaı oryndaý kerektigin meńgere bastadyq. Árıne, bir adam basqaryp otyrǵanda, barlyǵy jeńil sııaqty kórinýi múmkin. Al eki adamnyń oınaýy arqyly bir áýen men sazdy shyǵarý qajet bolǵanda, barlyǵy biz oılaǵannan áldeqaıda qıynyraq. Alaıda, ondaı kezde tehnıkalyq qyrynan ǵana emes, bizdiń saýsaqtarymyzdyń jumysy, kózdegen baǵytymyz, jalpy shyǵarmashylyq oıymyz ortaq, tipti ekeýmizdiń júregimiz bir bolyp ketedi eken», – deıdi Aıa Bolatova.
Láıla EDILQYZY,
«Egemen Qazaqstan»
ASTANA
