Oıyldyń tarysyn shetelge shyǵarý oılastyrylýda

    Oıyl aýdany – aq tarynyń atasy atanǵan Shyǵanaq Bersıev týǵan óńir. Aýdanda burynǵydaı kólemde bolmaǵanmen, qazir de tary ósirýmen aınalysatyn sharýa qojalyqtary bar. Solardyń ishinde “Jaqyp” sharýa qojalyǵynyń bul baǵyttaǵy sharýasy shıraq. “Bıznestiń jol kartasy-2020” baǵdarlamasy aıasynda 2,7 mln. teńge kóleminde memlekettik grant utyp alǵan qojalyqtyń sýarý tehnıkalary jáne taryny standarttyq jobada qaptaıtyn stanogy bolady. Sharýa qojalyǵyna taryny ótkizý úshin memlekettik standartqa saı sertıfıkat berilgen, bola­shaqta arnaıy patent alýǵa qujat­taryn tapsyryp qoıǵan. Sharýa qojalyǵynyń basshysy Jumabaı Jaqyp tary daqylyn zertteý boıynsha halyqaralyq uıymnyń músheligine ótip, onyń taǵamdyq qundylyǵyn tereń zertteý ju­mys­taryna qatysqan. Shet memle­ketterde ótken semınarǵa da qatysyp qaıtypty. Sharýa adamynyń tary ósirýmen aınalysyp júrgenin de biletinbiz. 2000 jyly 20 gekter alqaptyń ár gektarynan 25 sentner taza ónim aldy. 2012-2013 jyldary 140 gektarǵa egilgen tarynyń ár gektarynan 14 sentner ónim alyp, oblys kóleminde joǵary kórsetkishke qol jetkizdi. Bıyl sýarmaly ádispen 120 gektar jerge tary egipti. Tarynyń adam densaýlyǵyna paıdasy zor. 2015 jyly Astana qalasynda ótken tamaqtyń qun­dylyǵy jónindegi úlken konfe­rensııaǵa qatysqan Jumabaı Jaqyp ǵalymdarmen birlesip, taryny shetelderge shyǵarýdy oılastyrýda eken. Osylaısha, onyń taryny tek Aqtóbeniń ǵana emes, búkil Qazaqstannyń bren­dine aınaldyrý oıy bar. Al, ázirshe, «Jaqyp» sharýa qo­ja­lyǵynyń basshysy taryny Aqtóbe, Atyraý jáne Astana qa­la­­syna aparyp ótkizýmen shektelýde. Jumabaı Jaqyp tary ósirý­diń de, satýdyń da úlken qıyndyq týdyrmaıtynyn tilge tıek ete kelip, qunarly taǵamdyq da­qyldy óńdeý, tazartý, qýyrý, túıýdiń mashaqaty bastan asatynyn jetkizdi. Jınalǵan ónimniń barlyǵyn óńdeı almaıtyndyqtan ol taryny shıkileı ótkizýge basym­dyq berýde. Satybaldy SÁÝIRBAI, «Egemen Qazaqstan» Aqtóbe oblysy