Sapa – men úshin eń basty másele

– deıdi kásipker Gúlmıra Qońqasheva Qazaqstanda jasalǵan jáne tutynýshylardyń úlken sura­nysyna ıe bolǵan makaron ónim­deriniń biri – «Arzý» jaımalary. Taraz qalasyndaǵy «Ta-Mak» JShS shyǵaratyn jaımalar az ýaqytta naryqtaǵy básekelesterin yǵystyryp, tańdaýly ónimge aınalyp úlgerdi. Atalmysh ká­sip­oryn óndiretin ónimderdiń «Qazaqstannyń úzdik taýary» atanýy – osynyń dáleli. Naryq zańy qatal. О́ndirilgen ónim sapaly ári baǵasy qoljetimdi bolýy tıis. Onsyz básekelestikke tótep berý qıyn. «Ta-Mak» JShS osyndaı synaqtardyń bárinen óte bildi. Gúlmıra Qońqasheva basqaratyn seriktestik 2004 jyly makaron ónimderin shyǵaratyn seh ashyp, sapasy ımporttyq ónimderden kem túspeıtin jaıma ázirleý tásilin eki jyldyń ishinde meńgerip, kásiporyndy iske qosady. Úshinshi jyly Tarazda shyǵarylatyn jaımalar Ortalyq, Batys jáne Shyǵys Qazaqstan oblystaryna keń tarala bastaıdy. 2008 jyly makaron ónimderiniń basqa da túrlerin shyǵarýdy qolǵa alady. Sol jyldyń ózinde oblys kóleminde «Úzdik azyq-túlik óndirisi», respýblıkalyq «Altyn sapa» konkýrsynyń laýreaty atanǵan «Ta-Mak» JShS 2009 jyly «Halyq tańdaýy», 2010 jyly «Altyn kóshbasshy» atalymdary boıynsha jeńiske jetken. Halyqaralyq HASSP júıesi – tamaq ónimderiniń qaýipsizdigin qamtamasyz etýdiń jańa standarttary jáne malaızııalyq «Halal» standarty boıynsha ekologııalyq taza ónim óndiretin seriktestik 2012 jyly Reseıde ótken azyq-túlik ónimderiniń kórmesinde altyn medaldi ıelenedi. Kásiporynnyń táýligine 10 myń tonna ónim óndiretin ıtalııalyq avtomatty qurylǵyny iske qosqany da osy jyly. 2014 jyly máskeýlik konstrýktorlyq bıýromen birlesip, jańa avtomatty qaptama júıesin iske qosty. Ol álem­degi eshbir taýar qaptamasyna uqsamaıdy. Sonyń arqasynda «Arzý» taýar tańbasymen satylatyn jaımalar dúken sórelerinde birden erekshelenip turatyn boldy. «Ta-Mak» seriktestigi «Damý» kásipkerlikti damytý qory quı­ǵan ınvestısııanyń arqasynda óz ónimderin eksportqa shyǵara bastady. «Arzý» markaly makaron ónimderi Gollandııa, Fran­sııa jáne AQSh-tyń «Mueller Aussenhandel e.K.», «Monolith Süd GmbH» deldal kompanııalary arqyly Germanııa, Reseı, Qyrǵyz memleketteri men О́zbekstan naryǵyna shyǵarylýda. Búginde kásiporyn tutynýshylaryna «Ertóstik» degen taýar tań­basymen jańa brend usynýda. Mundaı qadam makaron ónimderin shyǵaratyn óndiris oryndary arasyndaǵy básekelestikke tyń serpin beretinin aıtady seriktestik basshysy. Ekinshi jaǵynan jańa josparlardyń týýyna jol ashady deıdi. – Sapa – men úshin eń bas­ty másele, – deıdi Gúlmıra Qadyr­qyzy. – Bir óndirýshilerge ónimniń neǵurlym mol shyǵarylyp, jan-jaqqa tynymsyz taralyp jatqany utymdy, al mende ondaı kólem qýalaý degen joq. Az shyǵarsam da tap-tuınaqtaı, barlyq talapqa saı bolýy tıis. Synǵan, maıysqan qamyrdy eshqashan oratpaımyn. Meniń jumysshylarym da ondaı júrdim-bardym áreketke bara almaıdy, óıtkeni, meniń talaptarymnan habardar. Eger sony bile tura abaısyzda jerge túsip qalǵan qamyrdy qorapqa sala salsa, onysy beınekameraǵa túsip qalady. Gúlmıra Qońqasheva úsh perzent ósirip otyrǵan aıaýly ana, ardaqty áje. Joldasy Talǵat ta osy zaýytta tize qosyp birge jumys isteıdi, dırektordyń oryn­­basary. «Osyndaı aqylshy er-azamatym bolmasa, munshama isti dóńgelete alyp keterim ne­ǵaıbyl edi», deıdi zaıyby týraly Gúlmıra Qadyrqyzy. Astanada qyzmet isteıtin úlken ulynan eki nemeresi bar. Ekinshi uly da elordada turady. Al sút kenjesi Saıajannyń jasy 7-ge endi tolady. 45 jasqa taqaǵanda dúnıege ákelgen erke qyzy dese Gúlmıra apaı­dyń jany bólek. «Keıde sol Saıajanyma kóńil bólýge ýaqyt tappaımyn, biraq kútýshisi ony kez kelgen ýaqytta ózi ákelip kórsetip turady», deıdi ol. Gúlmıra Qadyrqyzynyń taǵy bir qasıeti – qaıyrymdylyqqa bir ıyǵyn berip turady. Iá, bir qaraǵanda qataldaý, onsha-munshaǵa yqylas tanyta bermeıtin dáti berik jan bolyp kóringenimen, kóp áriptesterine qaraǵanda qoly ashyq. Mereke kezderinde óz óniminen toltyryp kólikke tıep alady da, balalar men qarttar úıine jol tartady. Bul ádetten jańylmaı kele jatqanyna qan­sha jyl. Mindetti túrde mol dastarqan uıymdastyryp, qoı soıdyryp, qazan-qazan et astyrady. Ánshiler men bıshilerdi aldyrady. Bir sózben aıtqanda, naǵyz shat-shadyman dýmandy merekeniń kórigi qyzady. Qazandaǵy sorpaǵa «Arzý» jaımalary salynyp, jınalǵandarǵa et tartylady. Kesh sońynda ákelgen qaıyrymdylyq kómegin mekeme basshylaryna tapsyrýdy da umytpaıdy. Al Jańa jyl merekesinde óz ónimderin tartý etkenimen shektelip qalmaı, balalar úıiniń balǵyndaryna Aıaz atanyń atynan syılyq ta ja­saıdy. Mundaı atymtaı jomart­tyqtyń syry sonshalyq tereńde dep oılamańyz. Bul – Gúlmıra Qońqasheva úshin kádýilgi nárse. – Jaǵdaıy bar ár adam solaı jasaýy tıis, – deıdi ol. – Men de kópbalaly otbasynda on balanyń jetinshisi bolyp dúnıege keldim. Men kórgen balalyq shaq ne tapsań da ózgelermen bólisýdi, qıyndyqqa tap bolǵan jandarǵa barynsha járdemdesýdi ómirdiń eń ajyramas bóligi retinde sanama sińirdi. Biraq onyń qaıtarymy bolar ma eken dep eshqashan dámetken emespin. Bul ómirde qandaı tabysqa jetsem de óz kúshime sengendikten, tabandylyǵymnan dep bilemin. Oralhan DÁÝIT, «Egemen Qazaqstan» Jambyl oblysy