Muqashyda forel ósiriledi

Forel – losos tuqymdas,  eti aq, qyzyl, sarǵylt tústes, adam aǵzasyna asa paıdaly, teńizder men ózen-kólderde ósetin, qymbat dámhanalar men meıramhanalarda paılanylatyn balyq. Buǵan deıin shyǵysta forel balyǵyn ósirýmen birde-bir mekeme shuǵyldanbaǵan. Taıaýda Zaısan aýdanynda issaparda bolǵan kezimizde balyqtyń asa qymbat túrin Qarabulaq aýylynyń Muqashy teliminde ósire bastaǵanyn, endi birer aıdan keıin ol saýda oryndaryna jóneltiletinin estip, birden atbasyn balyq ósirip jatqan azamattarǵa qaraı  burdyq. Qoldan jasalynǵan, qaz-qatar tizilgen beton naýalarda forel balyǵy birin-biri qýyp asyr salyp júr. Úlkendigi 30 santımetrge jetetin forel endi eki aıdan keıin saýda oryndaryna jóneltile bastamaq. Forel zaýytynyń dırektory Ernar Káribaev kóp sózge joq, tuıyq azamat eken. – Almatynyń janyndaǵy Talǵar aýylynda Ashat degen aza­­mat forel balyǵyn birneshe jyldan beri ósirip, meıramhanalarmen jáne dámhanalarmen kelisimshartqa otyryp, saýdasyn shalqytyp otyr. Forelge suranys úlken, sebebi, balyqtyń bul túrinde adam aǵzasyna asa paıdaly A,V,S dárýmenderi óte kóp. Foreldi sýǵa pisirip nemese qýyryp jeýge bolady, dámi til úıiredi. Budan bir jyl buryn almatylyq isker azamattardyń qoldaýymen Muqashyda forel balyǵyn ósirýdi qolǵa aldyq. Almatylyq fırma qarjylaı kómek jasady, eńbek etip jatqan 8 azamat aı saıyn 70-80 myń teńge kóleminde jalaqy alýda. Ony almatylyqtar tólep jatyr. Forel Almatydan ákelingen akvajemdi ǵana jeıdi, ósirýge qolaıly, – dedi Ernar inimiz. Erbol Ábenov degen balyq ósirip jatqan azamatpen til­destik. Ol qolyndaǵy torǵa  balyq­tardy toltyryp alyp bizge kórsetti. Syrty birneshe túske engen forelder aý ishinde sekirip, oınaqshyp, aınalasy bir mınót ótkende ólip qalǵandaı sulyq tústi. Bizdiń tiksinip qal­ǵanymyzdy ańǵarǵan Erbol sasatyn emes, bir balyqtyń basyn shertip qalyp edi, ol qaıtadan tirile saldy. Qalǵan balyqtardy sýǵa jibergeni sol edi, olar da jan­danyp ketti. Tabıǵattyń bul qubylysyna tańǵaldyq. – Qazir Zaısan aýdanynda 80-nen astam meıramhanalar men dámhanalar bar. Kásipkerlikpen shuǵyldanatyn azamattardyń forel balyǵyna tapsyrys beretini sózsiz. О́skemen men Semeıden qazirdiń ózinde tapsyrys túse bastaǵan syńaıly. Baqasý aýyly­nyń mańynda birneshe azamat sazan balyǵyn jasandy kólde ósirip jatyr. Ol da birer aıdan keıin saýdaǵa túspek. Elbasynyń Qazaqstan halqyna Joldaýynda shaǵyn jáne orta kásipkerlikke qoldaý kórsetý jóninde naqty tapsyrma berilgen. Aýdanda eki myńǵa tarta adam kásipkerlikpen shuǵyldanýda. Olarǵa aýdan ákimi Temirbek Qasymjanov kómek kórsetýde, – deıdi aýdandyq ishki saıasat bóliminiń basshysy Z.Dúısembaeva. Zaısannyń foreli óńirdiń basqa eldi mekenderinde ósirile bastasa jańadan ondaǵan adam jumyspen qamtamasyz etiler edi, degen oıda qaldyq.  Ońdasyn ELÝBAI Shyǵys Qazaqstan oblysy, Zaısan aýdany