Aýylda taýar óndirýshiler 71,1 mlrd. teńge qarjy alady

Bıyl kóktemgi egis jáne jınaý jumystaryn qarjylandyrý úshin «QazAgro» holdıngine 60 mlrd. teńge somasynda bıýdjettik nesıe berildi, ol holdıngtiń enshiles uıymdary men ekinshi deńgeıli bankterdiń arasynda bólindi, dep málimdedi Úkimettiń búgingi selektorlyq otyrysynda «QazAgro» holdıngi» aksıonerlik qoǵamynyń egin jınaý jumystaryna daıyndyq barysy týraly baıandaǵan Aýyl sharýashylyǵy mınıstriniń birinshi orynbasary Qaırat Aıtýǵanov. Onyń aıtýynsha, «QazAgro» holdıngi aýyl sharýashylyǵy taýaryn óndiretin 3420 zańdy tulǵany bıýdjettik nesıe qarajaty jáne bıýdjetten tys qarjy kózderiniń esebinen jalpy somasy 71,1 mlrd. teńgege  qarjylandyrǵan. «Mamandandyrý jáne egistik alańyna dándi daqyldar egýdegi úles boıynsha qarajatty ıgerý kezinde Soltústik Qazaqstan, Aqmola jáne Qostanaı oblystarynyń aýyl sharýashylyǵy taýaryn óndirýshiler belsendilik tanytty. «QazAgroQarjy» aksıonerlik qoǵamynyń jelisi boıynsha aýyl sharýashylyǵyna qajet egistik tehnıkalaryn satyp alýǵa 15,2 mlrd. teńgege 954 qarjy lızıngi sharty jasalyp, 594 traktor, 131 tuqym sepkish jáne basqa da egistik tehnıkasy jetkizildi. 503 orý-jınaý tehnıkasyn satyp alý úshin 9,2 mlrd. teńge jumsaldy, sonyń ishinde 7,3 mlrd. teńgege 160 birlik kombaın satyp alyndy», – dedi vıse mınıstr. Dınara BITIKOVA