Foto: Depositphotos.som
«Qazgıdromet» sınoptıkteri Qazaqstan boıynsha mamyr aıyna arnalǵan keńes sıpatyndaǵy aýa raıy boljamyn jarııalady. Oǵan sáıkes, el aýmaǵynyń kóp bóliginde jyly aýa raıy saqtalyp, jaýyn-shashyn mólsheri qalypty deńgeıde bolady.
Aıdyń basynda eldiń basym bóliginde aýa raıy turaqsyz sıpat alady – jańbyr jaýyp, keı jerlerde nóser, naızaǵaı, burshaq kútiledi, jel ekpini kúsheıip, daýylǵa ulasýy yqtımal. Mamyrdyń alǵashqy onkúndiginde (1-10 mamyr) batys, soltústik jáne shyǵys óńirlerde úsik júrýi múmkin.
Alǵashqy on kúnde aýa temperatýrasy óńirler boıynsha mynadaı deńgeıde qubylady:
– batysta túnde +2…+10 gradýs, topyraq betinde +1…+20 gradýs, kúndiz +12…+32 gradýs;
– soltústik pen soltústik-shyǵysta túnde +3…+8 gradýs, topyraq betinde +2…+15 gradýs, kúndiz +13…+31 gradýs;
– ortalyq pen shyǵysta túnde +3…+15 gradýs, kúndiz +20…+33 gradýs;
– ońtústikte túnde +8…+20 gradýs, kúndiz +18…+33 gradýs.
Boljamdar naqtylana túspek: «Qazgıdromet» sýperkompıýterdi paıdalana bastady
Mamyrdyń ekinshi jáne úshinshi onkúndikterinde batys, ońtústik, ońtústik-shyǵys jáne ortalyq aımaqtarda eń ystyq kúnderi aýa temperatýrasy +33…+41 gradýsqa deıin kóteriledi, al eldiń qıyr ońtústiginde +44 gradýsqa deıin jetýi múmkin.
Salqyndaý kúnderi túngi temperatýra +3…+10 gradýs shamasynda bolsa, kúndiz +18…+25 gradýs aralyǵynda bolady.
Soltústik pen shyǵys óńirlerde túngi aýa temperatýrasy +2…+9 gradýs aralyǵynda qubylyp, keı jerlerde topyraq betinde +1…+18 gradýsqa deıin tómendeýi yqtımal. Kúndizgi temperatýra +16…+33 gradýs shamasynda saqtalady.
