Foto: TJM
Batys Qazaqstan oblysynda keshe keshki ýaqytta bolǵan qaıǵyly oqıǵa eldi eseńgiretti. Bir ýaqytta úsh jasóspirim sýǵa batyp, kóz jumdy. Balalardyń denesi jergilikti turǵyndardyń kúshimen sýdan shyǵarylǵan. Bul aýmaqta sýǵa túsýge tyıym salynǵany týraly eskertý belgisi ornatylǵan.
«Qazir oqıǵanyń mán-jaıy men sebepteri anyqtalyp jatyr. TJM arnaıy jabdyqtalmaǵan jáne shomylýǵa arnalmaǵan jerlerde sýǵa túsý adam ómiri men densaýlyǵyna úlken qaýip tóndiretinin eske salady. Sý aıdyndarynda tek resmı túrde ruqsat etilgen oryndardy tańdaý qajet. Qaýipsizdik talaptaryn qatań saqtap, balalardy qaraýsyz qaldyrmaý mańyzdy», dep habarlady oblystyq TJD.
Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń basqarma bastyǵy Talǵat Jambaýovtyń aıtýynsha, sýǵa batý derekteriniń 95 paıyzy tyıym salynǵan jerde tirkeledi. Jalpy sýǵa túsýge ruqsat etilmegen jerge shomylǵan azamat pen sol aýmaqty uıymdastyrǵan adamdar da jaýapkershilikke tartylady.
«Ruqsat etilmegen jerde shomylǵan azamattarǵa Ákimshilik quqyq buzý týraly kodekstiń 412-baby boıynsha 7 aılyq eseptik kórsetkish (27 524 teńge) mólsherinde aıyppul salynady. Al jabdyqtalmaǵan orynda shomylý uıymdastyrǵan sý aıdynynyń ıesiniń ústinen qylmystyq is qozǵalady», dedi Talǵat Jambaýov.
Buǵan deıin Qaraǵandy oblysy Buqar jyraý aýdany Kókpekti aýylynda sý aıdynynda qaıǵyly oqıǵa bolyp, kámeletke tolmaǵan qyz bala kóz jumdy. Ol eresekterdiń qaraýynsyz ózen jaǵasyna baryp, tyıym salynǵanyna qaramastan sýǵa túsken. Qutqarýshylar shamamen 4 metr tereńdikte, jaǵadan 20 metr qashyqtyqta qyz balanyń denesin tapty.
Sonymen qatar Túrkistan oblysy Keles aýdanyndaǵy Oshaqty kanalynda aǵaly-inili eki bala sýǵa ketip, qaza tapty. Qutqarýshylar 8 jastaǵy Iýsýfahmet pen 13 jastaǵy Dıasty táýlikke jýyq ýaqyt izdegen.
Sondaı-aq 3 maýsym kúni Qosshy qalasynda Nura-Esil kanalyna dosymen birge shomylýǵa barǵan 10 jastaǵy bala sýǵa batyp ketti.
Mamandardyń aıtýynsha, aýmaqta sýǵa túsýge tyıym salynǵan belgiler ornatylǵan.
«Astana qalasy TJD jedel-qutqarý jasaǵynyń kúshimen balanyń denesi tabylyp, sýdan shyǵaryldy», dedi Aqmola oblysy TJD resmı ókili Ersaıyn Qoıshybaev.
Tótenshe jaǵdaılar mınıstrliginiń málimetinshe, elimizdiń sý aıdyndarynda profılaktıkalyq jumystar kúsheıgen. О́ńirlerde jazataıym oqıǵalardyń aldyn alý jáne demalýshylardyń qaýipsizdigin qamtamasyz etý maqsatynda reıdter, patrýldeý sharalary, oqytý aksııalary men túsindirý jumystary júrgizilip jatyr.
Astana qalasynda shomylý maýsymy bastalǵaly sýdaǵy qaýipsizdikti qamtamasyz etý jumystary kúsheıtilgen tártipte júrgizilip jatyr. 1 maýsymnan beri polısııa qyzmetkerleri men eriktilerdiń qatysýymen 2 reıdtik is-shara ótkizildi. Sonymen qatar Esil ózeninde qutqarýshylardyń kúndelikti kezekshiligi uıymdastyrylyp, saǵat 07:00-den 21:00-ge deıin úzdiksiz baqylaý júrgizilip otyr.
«Elordada shomylýǵa ruqsat etilgen 5 oryn bar. Olar kommýnaldyq jaǵajaı, Ortalyq saıabaqtaǵy Ortalyq qalalyq jaǵajaı, «Armına», «Trı peskarıa» jáne «Stolıchnyı dvor» demalys aımaqtary. Qala aýmaǵyndaǵy ózge barlyq sý aıdyndarynda shomylýǵa tyıym salynǵan», deıdi qalalyq TJD Tótenshe jaǵdaılardy joıý basqarmasynyń bas mamany Aıbek Tapash.
Almaty oblysynda TJD qyzmetkerleri óńirdegi barlyq sý aıdynynda kúndizgi jáne túngi ýaqytta kún saıyn profılaktıkalyq reıdter júrgizip jatyr. Erekshe nazar Qapshaǵaı sý qoımasy men Kólsaı kólderin qosa alǵanda, jappaı demalys oryndaryna aýdarylyp otyr. Baqylaý tıimdiligin arttyrý maqsatynda kvadrosıklder, ushqyshsyz ushý apparattary jáne kınologııalyq eseptoptar paıdalanylady. Shomylý maýsymy 1 maýsymda bastalǵanyna qaramastan, Almaty oblysynda sý aıdyndaryndaǵy qaýipsizdik qaǵıdalaryn buzǵany úshin 43 adam ákimshilik jaýapkershilikke tartyldy. Sondaı-aq kóliktik baqylaý ınspeksııasymen birlesip, qajetti ruqsat qujattary men tirkeý nómirlerinsiz paıdalanylǵan bes shaǵyn kólemdi keme arnaıy turaqqa qoıyldy.
Al Shymkent qalasynda «Rahat-Badam» demalys aımaǵynda qaýipsizdik máselelerine erekshe kóńil bólindi. Munda jergilikti atqarýshy organdar, polısııa qyzmetkerleri men eriktilerdiń qatysýymen aýqymdy profılaktıkalyq aksııa ótkizildi.
Qyzylorda oblysynda bıyl 7 jaǵajaı belgilengen. Olar Aral aýdanyndaǵy «Aqqumshyq», Qarmaqshy aýdanyndaǵy «Muratbaev», Syrdarııa aýdanyndaǵy «Qalǵandarııa», Shıeli aýdanyndaǵy «Báıgequm», Qyzylorda qalasyndaǵy «Syr tolqyny», «Edelvıs» jáne Jalaǵash aýdanyndaǵy «Asar» jaǵajaılary.
«Aımaqta sýǵa shomylýǵa tyıym salynǵan qaýipti 63 aýmaqqa 398 eskertý taqtaıshasy ornatyldy. Oǵan qosa, qaýipti aımaqtarda qoldanýǵa yńǵaıly ári ózindik quny tómen ınnovasııalyq tyıym salý belgileri ornalastyrylyp, 63 qaýipti aýmaqta 20 mobıldi post ornatyldy», deıdi Tótenshe jaǵdaılardy joıý basqarmasynyń bastyǵy Jandos Dosymov.
Sondaı-aq táýlik boıy jaýapty mamandardyń qatysýymen reıdtik jumystar júrgizilip otyr. Oǵan polısııa departamentiniń qyzmetkerleri, jergilikti atqarýshy organdar jáne 180 erikti tartylǵan.
Aımaqta jyl basynan beri Ákimshilik quqyqbuzýshylyq týraly kodekstiń 412-baby boıynsha (sý aıdyndaryndaǵy qaýipsizdik qaǵıdalaryn buzý nemese oryndamaý) 11 ákimshilik hattama toltyrylyp, 166 512,5 teńge aıyppul salyndy.
Jambyl oblysyndaǵy «Zerbulaq» demalys aımaǵynda jedel-qutqarý jasaǵynyń qutqarýshylary men Apattar medısınasy ortalyǵynyń mamandary alǵashqy kómek kórsetý jáne sýǵa batyp bara jatqan adamdy qutqarý boıynsha tájirıbelik sabaqtar uıymdastyryp, tótenshe jaǵdaı týyndaǵan kezdegi is-qımyl algorıtmin kórsetti.
Shyǵys Qazaqstan oblysynda Novostroıka aýyly mańyndaǵy Buqtyrma sý qoımasynyń Samar jaǵalaýynda maýsymdyq qutqarý beketi óz jumysyn bastady. Jazǵy kezeń boıy munda jedel-qutqarý jasaǵynyń qyzmetkerleri, órt sóndirý bólimsheleriniń mamandary jáne Qasym Qaısenov atyndaǵy № 68303 áskerı bóliminiń ekinshi qutqarý batalonynyń áskerı qyzmetshileri kezekshilik atqarady. Beket oqıǵalarǵa jedel áreket etý úshin qajetti tehnıkamen jáne júzý quraldarymen jabdyqtalǵan. Patrýldeý kater men gıdrosıkldiń kómegimen júzege asyrylady, sondaı-aq uzyndyǵy shamamen 110 shaqyrymdy quraıtyn jaǵalaý boıynda órt qaýipsizdigi talaptarynyń saqtalýyna monıtorıng júrgiziledi.
