Rıtanyń Rıodan úmiti mol

London Olımpıadasynda úl­ken senim artylǵan jeńil atlet­terdiń biri Margarıta Muqasheva bolatyn. Baıraqty báseke aldyndaǵy kórsetkishteri osal emes-tin. Alaı­da, Azııada qarsylas shydatpaı júrgen onyń sońǵy bási bıik básekelerde syr bere bastaǵany baıqaldy. Japonııada ótken chempıonatta vetnamdyq jelaıaq aldyn orap ketti. Brazılııadaǵy búkilálemdik qarýly kúshter oıyndarynda ekinshi oryndy qanaǵat tutty. О́ıtkeni, jattyǵýlardyń birinde alǵan jaraqaty janyna batyp, baby da kelispeı júrdi. Tipti, halyqaralyq ýnıversıada men álem chempıonatynda shań ju­typ qaldy. Dárigerler «jaraqatty túbe­geıli emdetpese bolmaıdy, áıt­pese asqynyp ketýi yqtımal» degen sheshimge kelgennen keıin májbúrlik saldarynan iri jarys­tardan qol úzýine týra keldi. Birer jyl sportpen ýaqytsha qoshtasyp, jattyqtyrýshylyq jumystarmen aınalysty. Biraq sportqa degen qushtarlyq pen qulshynys ony jeńil atletıkaǵa qaıta oraltyp, jankeshti jatty­ǵýlarǵa belsene kirisip, az ýaqyt­tyń ishinde úzdik­ter tobyna qo­syldy. Nátı­jesinde Azııanyń Gran-prı serııa­synda jeńimpaz atanyp, London Olımpıadasyna baratyn boldy. Jarys Qytaıdyń úsh qalasynda ótip, jeńil atletshi qyz 800 metr qashyqtyqqa júgirýde úsh altyn medaldy moınyna taqty. Japonııadaǵy baıraqty báseke aldynda Rýslan esimdi ómirlik jarymen otaý quryp, Masko tegin Muqashevaǵa aýystyrdy. Odan ári joly Olımpıada jeńimpazy men júldegeri Tatıana Kolpakova jáne Ǵusman Qosanovty eske alýǵa arnalǵan halyqaralyq týrnırlerde toǵysyp, sheberligin shyńdaı tústi. Gýanchjoý qalasynda ótken Azııa oıyndarynda 2 mınýt 02 sekýnd ýaqyt kórsetip, jeke rekordyn jańartty. Pavlodarlyq Vıktorııa Iаlovseva ekeýi «V» toby boıynsha lısenzııaǵa ıe bol­ǵanymen, sońǵy kezge deıin qaısysynyń el namysyn qor­ǵaıtyny belgisiz bolyp keldi. Aqyry tańdaý Muqashevaǵa tústi. Ol «A» kategorııasy boıynsha lısenzııa utyp alýdy jos­parlaǵanymen, senimnen góri kúmáni basym bolatyn. Sońǵy kezderi óziniń qatty sharshaǵanyn sezip júrdi. Eski jaraqaty da qaıtadan syr bere bas­tady. Soǵan qaramastan, nebir bıik belesterdi baǵyndyra bildi. London Olım­pıadasynda júlde almasa da osyndaı baıraqty bá­sekege  qatysýdyń ózin úlken már­tebe sanaıdy. Babynda júrgen onyń Rıo Olımpıadasynda baǵy janyp jatsa, esh tańǵalýǵa bolmas. Rıta Muqasheva jeńil atletıkamen 16 jylǵa jýyq aınalysyp ke­ledi. Onyń ómirinde da­ryndy balalarǵa arnalǵan ma­mandandyrylǵan sport mektep-ınternattyń alatyn orny aıryqsha. Osy bilim oshaǵynyń qabyrǵasynda naǵyz sportshy retinde tárbıelenip shyqty. Azııadaǵy jarystarda alǵashqy tusaýy Bangokte kesilip, Gran-prı júldegeri bolyp oral­ǵan. 2008 jyly halyqaralyq dárejedegi sport sheberi normasyn oryndady. Búginde ataǵynan at úrketin M.Muqasheva azııalyq jeńil atletshiler arasynda kósh bastap tur. Onyń «Grand-prix» halyqaralyq básekedegi 6 dúrkin jeńimpazy rekordyn ázirge eshkim qaıtalaı alǵan joq. Ýaqytynyń óte tyǵyzdyǵyna qaramastan, bilimin jetildirýge de ýaqyt taba bilgen Margarıtanyń alǵa qoıǵan maqsatkerligi súısin­diredi. Tehnık-baǵdar­lamashy ma­man­dyǵyn ıgergennen keıin jattyqtyrýshy-oqy­týshy dıplomyn alyp shyqty. Sosyn ekonomıka fakýltetine túsip, oıdaǵydaı aıaqtady. Elimizdiń jeńil atletıka ulttyq quramasynda biraz jyl qyzmet atqardy. – Rıo Olımpıadasyna lısenzııa utyp alý sonshalyqty qıynǵa túse qoıǵan joq. Degenmen, baıraqty básekege álemniń ár túkpirinen kileń myqtylar jınalatynyn eskersek, júlde úshin talastyń tartysty óteri anyq. Qoldan kelgenshe Qazaqstan namysyn bermeý­ge tyrysamyn, – degen edi BAQ ókilderimen ótkizgen brıfıngte Margarıta Muqasheva. Laıym, jeńistiń bıik tórinen kóringeı deımiz jelmen jarysqan jelaıaq jerlesimizge. О́mir ESQALI, «Egemen Qazaqstan» PETROPAVL