Rıo-2016. Levıt-Tıshenko: Rıngtegi janjal (vıdeo)

Reseıdiń «Sport-Ekspress» gazeti óziniń 16 tamyz kúngi nómirinde «Rıo-2016, 10-shy kún: Tıshenkonyń janjaldy altyny jáne Brazılııa nóseri» degen maqala jarııalap, sonyń bir tarmaǵyn keshe tań aldynda 91 kıloǵa deıingi salmaqta qazaqstandyq Vasılıı Levıt pen reseılik Evgenıı Tıshenkonyń arasynda oınalǵan fınaldyq jekpe-jek týrasyna arnaıdy.

Basylymnyń «Rıngtegi janjal» degen taqyrypsha boıynsha berilgen sol maqalasy, qazaqshaǵa aýdarǵanda, bylaısha oı órbitedi: «Reseıdiń Rıodaǵy 11-inshi altyny aıtarlyqtaı janjaldy oqıǵaǵa ilesip keldi. 91 kıloǵa deıingi salmaq dárejesiniń fınalynda tóreshiler jeńisti qarsylasy qazaqstandyq Vasılıı Levıt bolǵan reseılik Evgenıı Tıshenkoǵa bir aýyzdan berdi. Munyń problemasy rıngte-aq bastaldy: qazaqstandyq jankúıerler zalda otyrǵan HOK basshysy Tomas Bahtyń týra kóz aldynda arbıtrlardyń sheshimin ysqyryp qarsy aldy. Baspasóz máslıhatynda olardyń isin qazaqstandyq jýrnalıster jalǵastyrdy, birqatar belgili kásipqoılar men promoýterler de osyǵan qatysty óz oılaryn bildirdi. -Maǵan urys jaıly syrttan baǵa berý qıyn, - dep Tıshenkoǵa aqtalýǵa týra keldi sol jerde. – Eger men ádiletsiz utqan bolsam, Vasılııden keshirim suraımyn. Eger adalyna júginsek, tóreshiler sheshimine qatysty shynynda da birqatar suraqtar bar. Levıt urys kezinde qarqyndy kórindi, urǵandary da jıi tıip jatty, al úshinshi raýndta tipti qarsylasyn nokdaýnǵa attandyryp jibere jazdady. Tıshenkonyń sol tusta «qalqyp» júrgeni baıqaldy. Bálkim, sol kezde basynan alǵan jaraqaty ǵana reseılikti budan da zor problemadan qutqaryp qalǵan shyǵar. Tóreshiniń jekpe-jekti toqtatqany bolashaq chempıonnyń azdap tynys alyp qalýyna kómektesti». Buǵan qosatynymyz, osyndaı janjaldy sheshim shyǵarǵan tóreshiler Irlandııa, Aljır jáne Kolýmbııa elderiniń mamandary bolyp shyqty. Qazir birqatar jankúıerler AIBA-ǵa bul jekpe-jektiń nátıjesin qaıta qaraý jónindegi usynys beretin petısııaǵa qol jınastyryp jatqan kórinedi. Damır QOJAMQUL https://youtu.be/9sqOEQlON7o