Etik tikkenniń esebi túgel

Beıbit Hadısuly aýdan ortalyǵy Aqqý­lyda turady. Aıaq kıimder tigetin kásibin sha­ǵyn ǵana seh-bólmesinen bastady. Kóz – qorqaq, qol – batyr. Qazir «Rymhan Kúntýǵan» atty jeke kásipkerlik sharýasy birtindep jolǵa túsip keledi. Endi kádimgi krossovka­lar shyǵarmaqshy. Bıyl 40 jup aıaq kıim tigipti. Qajetti buıymdardy Reseıden ákeledi. Kros­sovkalar uzaq merzimge shydaıdy, ekologııalyq taza materıaldan jasalǵan. Baǵasy – 10 myń teńge. Kásibin keńeıte túsý úshin «Jumyspen qamtýdyń jol kartasy-2020» baǵdarlamasy aıasynda 700 myń teńge kóleminde nesıe alýǵa ótinish beripti. Jambyl oblysynyń bylǵary zaýytymen shıkizat alý boıynsha kelisimshart jasamaqshy. Baıan-О́lgeı aımaǵynda týyp-ósken Beıbit 1992 jyly eki el arasyndaǵy eńbek shartymen alǵashqylardyń biri bolyp elge jetti. Besqaraǵaıda qoı baǵa júrip, mal terisin ılep, iske asyrýdy oılaıdy. Aldymen «ýnty» aıaq kıimin tigip kóredi. Kásibi jandana bastaǵan soń, zamanǵa saı talpynys jasap, Qytaı, Omby, Semeı bardy. Elimizde qabyldanǵan «Bıznestiń jol kartasy-2020» baǵdarlamasy qabyldanǵan kezde «Damý» kásipkerlikti damytý qory bólimshesinde oqydy. Arnaıy grant utyp aldy, sertıfıkat berildi. Semeıden etik tigýge qajetti buıymdar, teri ıleýge qajetti ónimder, Om­by­dan aıaq kıim tabandaryn aldyrdy. Qytaıdan is máshińkelerin, arnaıy qalyptar, jipter jet­kizdi. Iá, Beıbittiń shaǵyn ǵana aıaq kıim tigý sehy aýyldyń bir óndiris orny ispetti. О́ıt­keni, bul jerde kásipker ónim jasap shyǵarýda, aýyldyqtar suranysyn óteýde. – Jylqy terisinen tigilgen aıaq kıimniń ereksheligi keýip qalmaıdy. Taban jyly júredi, densaýlyqqa paıdaly. Baǵasy 5-7 myń­nyń aınalasynda. Ulttyq órnekti aıaq kıim­der tigý de oıymda bar. Otandyq ónim, otandyq zat, bárinen buryn «Aýylda jasalǵan» degen belgimen aıaq kıimi shyǵarý bir baqyt, – deıdi kásipker jigit. Farıda BYQAI, «Egemen Qazaqstan» Pavlodar oblysy, Lebıaji aýdany