Zamanaýı zaýyt

eýropalyq standartqa saı alıýmınıı buıymdaryn óndiredi Zaman talabyna saı jas býyn ókilderi shetelderge baryp, bilim alyp elge oralysymen otandyq ónim óndirýdi jedel júzege asyra bastaǵany qýantady. Bul úrdis Jetisý jerinde de jyldam júzege asyrylýda. Eń bastysy, sapaǵa basa nazar aýdarylady. «Osy seriktestiktiń bıznes jobasyn 2013 jyly ózim jasap, araǵa eki jyl ýaqyt salyp zaýytty iske qosý múmkindigine ıe boldyq. Sol ýaqyttan beri óndiris orny toqtaýsyz jumys istep keledi. Búgingi tańda 120 adam eńbek etedi. Qajetti shıkizatty Pavlodardaǵy Qazaqstan elektrolız zaýytynan alamyz. Kádimgi kirpish ispetti árqaısysy 20-50 kılolyq qup-qurǵaq «shýshka» dep atalatyn shıkizatty alyp, balqytyp, «bılet» degen qosyndyny qosamyz. Dıametri – 203 mm jáne 152 mm uzyndyǵy – 6 metr. Biraq, Pav­lo­dardan kelgen shıkizattyń ishindegi magnıı men marganesti eri­tý arqyly bólemiz. Hımııalyq qura­my eýropalyq standart boıynsha 6063, 6463, 6060 bolady. Jalpy, sala óndirisinde alıýmınıı profılin óndirý arqyly anodty oksıd degen jańa tehnologııamen túsin ózgertemiz. Sonda bizdiń ónim barlyq talap boıynsha eýropalyq standartqa sáıkes kelip otyr. Ekologııalyq turǵydan teksergende plastıkte zııan bar ekendigi, al alıýmınııde joqtyǵy anyqtalǵan. Búginde Eýropa memleketterinde alıýmınııdi qaıta óńdeý tásili bar. Mysalǵa, óndiris oryndarynda jasalǵan alıýmınıı ónimderi talapqa sáıkes kelmeı jatsa, sol ónimdi qaıta óńdep balqytýǵa bolady», dedi «Aluminium of Kazakhstan» JShS bas dırektory Nursultan Jumabek. Indýstrııalyq-ınnova­sııa­lyq damý memlekettik baǵdar­la­ma­sy aıasynda arnaıy uıym­das­tyrylǵan telekópirde Elbasynyń ruqsatymen «Aluminium of Kazakhstan» JShS alıýmınıı profılderin shyǵarý zaýyty iske qosylǵany málim. Qazirgi ýaqytta bul óndiris orny HOFFMANN Aluminium saýda tańbasymen joǵary tehnologııamen tolyq kezeńdi alıýmınıı profılderin óndirýshi zaýyt bolyp tabylady. Alıýmınıı profılderin shyǵarý zaýyty quıý sehy men 1540 jáne 2400 tonnalyq baspaqtan, oǵan qosa untaqty boıaý men anodtaý tizbeginen qurylǵan. Jalpy aýmaǵy 14 000 sharshy metr. Zaýyt tehnologııalyq úrdisi bastapqy kezeńdegi alıýmınııdi qaıta óńdeý jolymen 1000-nan asa ártúr­li alıýmınıı profılderin eýro­pa­lyq standartqa saı shyǵara­dy. Zaýyttyń jobalyq qýaty jy­lyna – 16400 tonna. Zaýyt qyz­met­kerleri Túrkııa jáne Qazaqstan Respýblıkasynyń joǵary kásibı ınjener-tehnolog mamandarynan quralǵan. Zaýyt iske qosylǵannan beri 1500 tonnaǵa jýyq alıýmınıı buıymdaryn óndirdi. Nurbol ÁLDIBAEV, «Egemen Qazaqstan» Almaty oblysy, Ile aýdany