Jasotandyqtar ardagerlerge qurmet kórsetti

El táýelsizdigiń 25 jyldyǵyna oraı, «Nur Otan» partııasy janyndaǵy «Jas Otan» jastar qanatynyń uıymdastyrýymen «Ardagerlerdi ardaqtaıyq» atty merekelik is-shara Esil ózeniniń jaǵalaýynda ótti. «Qarty bar eldiń qazynasy bar» degen ulaǵatty sózdi ulyqtaı bilgen qazaq jurty qashanda aqjaýlyqty analarymyz ben aqsaqaldy qarııalarymyzdy aıalaı, ardaqtaı bilgen. Sharaǵa Astana qalasynda turatyn 60-qa jýyq eńbek ardageri qatysty. Is-shara eli úshin eńbek etip, ter tókken ardaqtylarǵa kóterińki kóńil kúı ǵana syılap qoımaı, ár adamnyń boıynda ulttyq patrıotızmdi oıatý, jas urpaqtyń aǵa býyn ókilderine qurmetpen qaraýyn qalyptastyrýǵa baǵyttalyp otyr. Igilikti isti uıymdastyryp otyrǵan «Jas Otan» jastar qanatynyń múshesi Baqdáýlet Jandildaev: «Bizdiń uıym – qalamyzdyń qarttaryna únemi kómek kórsetip, árbir mereke kúnderi konsertter uıymdastyrýdy jaqsy dástúrge aınaldyrǵanyn aıta ketsek deımin. Búgin mine, qala kórkin ata-analarymyz tamashalasyn dep kememen serýendeýdi uıymdastyryp otyrmyz. Bul kishiniń úlkenge degen qurmeti dep oılaımyz. Eki aptadan keıin qarttar úıinde turyp jatqan kóńili jarym qarııalardy serýenge alyp shyqsaq degen nıettemiz», – dedi. Eńbek ardageri Meıram Shaǵaltaevty áńgimege tartqanymyzda ol: – Qasıetti táýelsizdigimizdiń 25 jyldyǵy qutty bolsyn, qaraqtarym! Esil ózenindegi serýendeý kóńilimizdi kókke kóterdi. Jastarymyz ósip órkendeı bersin, elimiz aman, jurtymyz tynysh, beıbit kúnde berekeli ómir súre bereıik! – dep, jasotandyqtarǵa alǵys aıtty. Qarttardy qadir tutatyn mundaı merekelerdi jyl saıyn ótkizip turý jónindegi bastama kimge de bolsa úlgi. О́zge óńirler bul úrdisti jalǵastyrsa, nur ústine nur. Aıman MUQYShEVA