Trıatlonnan alǵash ret ashyq birinshilik ótedi

Qapshaǵaı sý qoımasynda osy jyldyń 28 tamyzynda trıatlonnan kásipqoılar men áýesqoılardyń qatysýymen Qazaqstannyń «ALTYN ADAM TRIATHLON 2016» I ashyq birinshiligi ótedi. Qazaqstan trıatlon federasııasynyń baspasóz qyzmeti habarlaǵandaı, chempıonatqa kez kelgen tilek bildirýshi qatysa alady. Jarys qorytyndysy boıynsha jaqsy nátıje kórsetken sportshylar Qazaqstan quramasyna kiredi. Birinshilikti uıymdastyrýshylardyń aıtýynsha, «ALTYN ADAM TRIATHLON 2016» jarysy qarapaıym azamattarǵa sport juldyzdarymen etene tanysýǵa, sondaı-aq, jeńiske degen qulshynysyn oıatyp, kúsh-qýatyn arttyrýǵa múmkindik beredi. Qazaqstan trıatlon federasııasynyń prezıdenti Murathan Toqmadıdiń sózine qaraǵanda, birinshilikte shetelderden de sportshylar kelip saıysqa túsedi. Olardyń arasynda trıatlonnan (ITU-Halyqaralyq trıatlon odaǵy) álemniń 3 dúrkin chempıony Pol Ameı bar. Sonymen qatar, ol 6-14 qyrkúıek aralyǵynda osy sport túriniń maıtalmany Krıs Makkormaktyń qatysýymen tájirıbeli trıatlonshylar jıyny ótetinin, bul óz kezeginde Almatynyń týrızm salasyn damytýǵa qosylar eleýli úles bolatynyn jetkizdi. Al Qazaqstan trıatlon federasııasynyń vıse-prezıdenti Gadjı Gadjıev: «Qazirgi tańda bizdiń aldymyzda turǵan negizgi mindet – myqty, tájirıbeli trıatlonshylardy anyqtap, olardyń halyqaralyq jarystar men álemdik birinshilikterge daıyndaý. Aldymyzda 2020 jyly ótetin Olımpıada tur. Biz osyndaı bedeldi, bıik deńgeıli jarystarda dańq tuǵyryna kóterilýge tıistimiz. Bizde jeńiske degen qushtarlyq mol», – dedi. Aıta keteıik, 28 tamyzda ALTYN ADAM TRIATHLON 2016» I ashyq birinshiligi «Rıvera» qonaq úıiniń aýlasynan bastaý alady. Ázirge, qatysýshylardy federasııanyń www.triathlon.kz saıty arqyly tirkeý júrgizilýde. Joldybaı BAZAR