Túlegin maqtan tutady

Burnaǵy kúni S.Seıfýllın atyndaǵy Qazaq agrotehnıkalyq ýnıversıtetiniń ustazdary osy bilim ordasynyń túlegi – Rıo Olımpıadasynyń chempıony Danııar Eleýsinovti ulyqtaýǵa arnalǵan kesh ótkizdi. Onda chempıonnyń adamı qasıetteri men stýdent kezindegi sabaq úlgerimi jan-jaqty sóz boldy. Boksshy Danııar Eleýsinov 2009-2013 jyldar aralyǵynda atalǵan oqý ordasynan qar­jyger mamandyǵy boıynsha bilim alǵan. Ol osy jyldar ishinde oqý men boksty qatar ala júrip, aınalasyndaǵy dostary men ustazdaryna syıly boldy, álemdi moıyndatqan maıtalman boksshy bolyp qalyp­tasty. – Danııar óte qarapaıym, mádenıetti bolatyn. Ol stýdent kezinde-aq Qazaqstannyń ishki chempıonaty men halyqaralyq jarystarǵa qatysyp, júldeli oryndar alyp júrdi. Qazir eki­niń biri maqtanýǵa, tanylý ar­qyly juldyz bolýǵa umty­lady. Biraq, bizdiń Danııar múlde ondaı emes. Tanymal boksshymyn dep maqtanbaıdy. Biz onyń kishipeıil qasıetin qurmetteımiz. Shynyn aıtý kerek, mundaǵy muǵalimder oǵan kóp kómek kór­setti. Ási­rese, jarystarǵa ba­ratyn kez­de sabaqtan bosatyp, kelgen kezde oqý baǵdarlamasyn ar­naıy úıretip júrdi. Qys­qasyn aıtqanda, Danııar biz­diń túlegimiz bolǵanyna maqta­namyz, – deıdi ekonomıka fa­kýl­tetiniń dekany Álııa Ismaılova. Shara barysynda da­raboz Danııardyń keshegi boksyn ýnı­versıtettiń ujymy uıym­shyldyqpen birigip teleekrannan tamashalaǵany aıtyldy. Tileýin tilep, qoldaý kórsetken ustazdary: «Shákirtimizdiń Olımpıada chempıony bolatynyn sezdik, – deıdi. – О́ıtkeni, Danııardy Olımpıadaǵa kete­rinen buryn ýnıversıtetke sha­qyryp, stýdenttermen kezdesý uıymdastyryp, sáttilik tiledik. Sonda ol nyq senimmen: «Men qaıtsem de Qazaqtannyń kók týyn jelbiretemin. Chempıon bolamyn» dep aıtqan-dy. Biz de ishteı aıtqanyń kelsin, dege­nińe jet dedik, – deıdi qarjy kafe­drasynyń meńgerýshisi Zám­zágúl Baımaǵambetova. Osylaısha, Rıo Olım­pıa­­­da­synyń alty qurlyqtan jı­ylǵan boksshylar básekesinde qarsylastaryn qoǵadaı japyrǵan Danııar jaıly qyzyqty áńgimeniń tıegin aǵytqan ustazdary: «Stý­dent kezinde ol bir ret oqýdan shyǵýǵa oqtalyp, aryz jazǵysy keldi. Alaıda, biz onyń bul áreketin quptamadyq. Sol kezde qarsylyq tanytpaǵanymyzda, chempıon shákirtimiz bar dep aıtpas edik», deıdi. Oraıy kelgende, biz de ózi oqyǵan qara sha­ńyraqqa chempıon qashan at basyn burady dep suradyq. Fakýltet dekanynyń aıtýynsha, Danııardyń stýdenttermen kezdesýi aldaǵy qyrkúıek aıynda uıymdastyrylmaq. Talǵat RAIYMBEK, «Egemen Qazaqstan»